Dekabrın 25-də Azərbaycan Dövlət Neft və Sənaye Universitetində (ADNSU) Geofizika elminin inkişafında böyük xidmətləri olmuş geologiya-mineralogiya elmləri doktoru, professor Rəsmi Abdullayevin 100 illik yubileyinə həsr olunmuş tədbir keçirilib. Tədbirdə açılış nitqi ilə çıxış edən ADNSU-nun rektor əvəzi, dosent Vazeh Əskərov qonaqları salamlayaraq ADNSU-da bu formatda tədbirin keçirilməsinin önəmini qeyd edib. Universitetin çoxsaylı fəxri məzunları arasında Rəsmi Abdullayevin olmasının heç də təsadüfü olmadığını deyən dosent Vazeh Əskərov onun geologiya elminə verdiyi töhfələrdən danışıb.
Sonra iştirakçılar müvafiq olaraq “Geofiziki kəşfiyyat üsulları” kafedrasının professoru Tofiq Əhmədov “Professor R.Ə.Abdullayevin həyatı və fəaliyyəti” haqqında, Geologiya və Geofizika İnstitutunun direktoru, akademik Akif Əlizadə “Professor R.Ə.Abdullayev – görkəmli alim” mövzusunda, “Geofiziki kəşfiyyat üsulları” kafedrasının müdiri, professor Vaqif Seyidov “Geofizika kafedrasının tarixindən” mövzusunda, Geologiya-mineralogiya elmləri doktoru, Namaz Yusubov “Pedaqoq və alim professor R.Ə.Abdullayev” mövzusunda çıxış ediblər. Çıxışlarda Rəsmi Abdullayevin təkcə Azərbaycanda deyil, eyni zamanda dünya miqyasında tanınmış geoloq olduğunu qeyd ediblər və onun həyat və yaradıcılığından bəhs ediblər.
Tədbirdə ADNSU-nun fəxri professoru Lev Eppelbaumun Rəsmi Abdullayev haqqında video çıxışı nümayiş olunub. Yubilyarın oğlu, fəlsəfə doktoru Nazim Abdullayev atasının xatirəsinə göstərilən diqqət və qayğıya görə təşəkkürünü bildirib.
Sonda tanınmış geoloq Rəsmi Abdullayevə həsr olunmuş “Zamanın qırışları ilə çəkilmiş portret” filminin ssenari müəllifi, tanınmış jurnalist Nadejda İsmayılova çıxış edərək film haqqında fikirlərini bölüşüb, R.Abdullayevin sağlığında onunla həmsöhbət olmağın və belə bir filmin ərsəyə gətirməyin nə qədər çətin, lakin qürurverici olduğunu deyib.
Sonda R.Abdullayevə həsr olunmuş “Zamanın qırışları ilə çəkilmiş portret” filmi nümayiş olunub.
Tehsil-press.az
