Dünya üzrə insanlar arasında ölümün əsas səbəbləri arasında ürək xəstəlikləri və ürək infarktı var. Ürək-damar xəstəlikləri səbəbindən hər il təxminən 17,9 milyon insan həyatını itirir. Ürək cərrahı Dr. Ceremy London ürək sağlamlığını təhdid edən üç əsas “səssiz qatili” açıqlayıb.

Dr. Londonun açıqlamasına görə, bu risk faktorlarının başında piylənmə, hərəkətsiz həyat tərzi və siqaret çəkmək gəlir.

Onun sözlərinə görə artıq çəki və piylənmə ürək xəstəliklərinin inkişafında ciddi rol oynayır. Dr. London qeyd edir ki, piylənmə ilə yanaşı pis qidalanma, yüksək qan təzyiqi, diabet və yüksək xolesterol da ürək xəstəliyi riskini artırır. 2024-cü il tədqiqatlarına görə, ABŞ-də piylənmə səbəbindən ürək xəstəliklərindən ölüm halları 1999–2020-ci illər arasında 180% artıb.

Hərəkətsiz həyat tərzi də ürək sağlamlığı üçün böyük təhlükə yaradır. Uzun müddət oturmaq bədənin qan təzyiqini, xolesterol və çəki balansını pozur. Tədqiqatlar göstərir ki, gündə 10 saat və ya daha çox hərəkətsiz qalmaq, hətta müntəzəm idman edənlərdə belə, ürək çatışmazlığı və ürək-damar ölüm riskini artırır.

Siqaret çəkmək isə ürək üçün ən zərərli vərdişdir. Dr. London bildirir ki, siqaret arteriyaları və ümumi sağlamlığı təsir edir və ürək xəstəliklərinin başlıca səbəblərindən biridir. 2021-ci il tədqiqatına görə, siqaret çəkənlərin ürək xəstəliklərindən ölmə ehtimalı ağciyər xərçəngindən ölmə ehtimalından daha yüksəkdir.

Ekspertlər vurğulayır ki, artıq çəki və hərəkətsizliklə mübarizə aparmaq, sağlam qidalanmaq, müntəzəm idman etmək və siqareti tərgitmək ürək xəstəlikləri riskini ciddi şəkildə azalda bilər.

Dünya üzrə ürək xəstəliklərinə qarşı mübarizə aparmaq üçün fərdi sağlamlıq tədbirlərinin artırılması vacib hesab olunur.

Tehsil-press.az