Azərbaycan Milli Elmlər Akademiyası (AMEA) rəyasət heyətinin innovasiya şöbəsinin təşəbbüsü, akademiyanın Gənc Alim və Mütəxəssislər Şurası, müəllif hüquqları və patent şöbəsinin birgə təşkilatçılığı ilə silsilə seminarlar keçiriləcək.
Akademiyadan tehsil-press.az-a bildiriblər ki, AMEA-nın Mərkəzi Elmi Kitabxanasında noyabrın 8, 18 və 22-də təşkil olunacaq seminarların məqsədi innovasiya fəaliyyətinin, elm-istehsalat əlaqələrinin genişləndirilməsi və multidissiplinar innovativ layihələrin hazırlanması, elmin kommersiyalaşdırılmasının təşkilində patent və lisenziyaların rolu, bu istiqamətdə beynəlxalq təcrübələrin öyrənilməsi, həmçinin AMEA-nın Təcrübə-Sənaye Zavodunda həyata keçirilən innovativ layihələrlə tanışlıqdır.
Tədbirə akademiyanın bölmələri üzrə müvafiq institutların elmi katibləri, elmi işlər üzrə müavinləri, gənc alim və mütəxəssislər, elmi-tədqiqat və innovasiya sahəsində çalışan mütəxəssislər, AMEA-nın Təcrübə-Sənaye Zavodunda fəaliyyət göstərən layihə müəllifləri, eləcə də beynəlxalq proqramlarda iştirak edən milli əlaqələndiricilər və magistrlər qatılacaqlar.

Tehsil-press.az