BDU-nun xanım əməkdaşları ölkənin ictimai-siyasi həyatında fəal iştirak edirlər

BDU-nun xanım əməkdaşları ölkənin ictimai-siyasi həyatında fəal iştirak edirlər Bakı Dövlət Universitetində (BDU) 8 mart - Beynəlxalq Qadınlar Gününə həsr olunan tədbir keçirilib.
Tədbirdə Azərbaycanda və BDU-da elm və təhsilin inkişafında, ictimai həyatda qadınların yeri və rolu mövzusunda çıxışlar olub.
BDU-nun rektoru Elçin Babayev Beynəlxalq Qadınlar Günü münasibətilə bütün qadınları, eləcə də universitetin xanım əməkdaş və tələbələrini təbrik edib. Rektor qeyd edib ki, ölkəmizdə dövlət qadın siyasətinin əsasını qoyan ümummilli lider Heydər Əliyev qadın şəxsiyyətinə böyük hörmət və ehtiramla yanaşıb. Dahi rəhbər ölkə həyatının bütün sahələrində qadınlara xüsusi yer ayırdı, onların hərtərəfli fəaliyyətinə geniş meydan verdi. Həmin siyasəti Prezident İlham Əliyev uğurla davam etdirir. Bu gün ölkəmizdə qadınların dövlət qurumlarında, seçkili orqanlarda irəliyə çəkilməsi, onların potensialından istifadə olunması cəmiyyətimizin aparıcı hissəsi olan qadınların imkanlarından yetərincə bəhrələnmək siyasətinə sadiqliyini ortaya qoyur.
E.Babayev bildirib ki, Azərbaycan Respublikasının Birinci vitse-prezidenti Mehriban Əliyevanın ölkənin ictimai-siyasi həyatında uğurlu fəaliyyəti, dövlətimiz, dövlətçiliyimiz naminə, xalqın rifahı üçün gördüyü işlər bu gün Azərbaycan qadınının nə qədər fəal olduğunu bir daha təsdiq edir. Rektor çıxışı zamanı ölkənin ictimai-siyasi həyatında mühüm nailiyyətlərin əldə edilməsində BDU ailəsinin üzvü olan qadınların da böyük əməyi olduğunu bildirib, onların üzərinə düşən vəzifələri layiqincə yerinə yetirməsini yüksək qiymətləndirib.
Daha sonra Milli Məclisin Ailə, qadın və uşaq məsələləri komitəsinin sədri, BDU-nun professoru Hicran Hüseynova, Milli Məclisin üzvü, professor Jalə Əliyeva, Əməkdar incəsənət xadimi Fəxriyyə Xələfova, universitetin Gender və psixologiya kafedrasının müdiri, professor Rəna İbrahimbəyova, Cinayət hüququ və kriminologiya kafedrasının müdiri, professor Şəhla Səmədova, BDU-nun Nanoaraşdırmalar Elmi-Tədqiqat Mərkəzinin elmi işçisi Aynurə Kərimova qadınların ölkənin ictimai həyatında, elm və təhsil, mədəniyyət və incəsənətin inkişafında rolundan bəhs ediblər. Çıxışlarda qadının ailədə, işdə və cəmiyyətdə layiqli yer tutmasının dövlətimizin prioritet istiqamətlərindən olması, ölkəmizdə qadınlar üçün geniş imkanlar yaradılması, məşğulluq, sağlamlıq, təhsil və sosial siyasət sahəsində gender bərabərliyinin inkişaf etdirilməsi haqqında ətraflı məlumat verilib.

Tehsil-press.az

Oxşar xəbərlər