Rusiya xarici işlər nazirinin müavini Mixail Qaluzinin son açıqlaması diqqət çəkib. Belə ki, o, Azərbaycanın Rusiya Federasiyası ilə müttəfiqliyin vacibliyini anladığını və Moskvanın Bakının gələcək addımlarında bunu rəhbər tutacağını gözlədiyini bildirib. Türkiyə mediasının yaydığı məlumata görə, “Sputnik”in və “Rus evi”nin bağlanmasına qarşılıq olaraq Moskva Novorossiysk neft kəmərinin bağlanması variantını müzakirə edir. Lakin rəsmilər bu addımın Bakıya böyük təsir etməyəcəyini vurğulayıblar.

Maraqlıdır ki, Türkiyənin ən böyük media quruluşlarından olan “Türkiye” qəzetində bu cür analitik yazının dərci təsadüf sayıla bilməz. Bu qəzetdə çıxan belə bir yazı Türkiyə dövlətinin mövqeyi və məlumatı, eləcə də xəbərdarlığı kimi qəbul edilir.

Rusiya ilə münasibətlərdəki gərginlik fonu azalıbmı? Moskva Azərbaycana qarşı hansı ağır silahını işə salmağı planlayır?

Politoloq İlyas Hüseynov deyib ki, məlum təyyarə qəzasından sonra Rusiya və Azərbaycan arasındakı münasibətlərdə soyuqluq anlaşılandır:

“Rusiya ilkin hesabatın nəticələrinə baxmayaraq məsuliyyəti üzərinə götürməkdən boyun qaçırır. Beynəlxalq hüquqla üzərinə düşən öhdəliklərə əməl etmək istəmir. Azərbaycanın irəli sürdüyü şərtlərə biganəlik iki ölkə arasında münasibətlərin soyuqluğuna səbəb olub. Rusiyanın bu yanaşması qəbuledilməzdir. Azərbaycanda “Sputnik”in fəaliyyətinin məhdudlaşdırılması, “Rus evi”in bağlanmasına Rusiya kifayət qədər aqressiv və radikal mövqe sərgiləyib.

Novorossiysk neft kəmərinin bağlanması barədə fikirlər dezinformasiyadır. Bu məlumat hələ ilk vaxtlardan səsləndirilirdi. Lakin bağlansa belə, Azərbaycan iqtisadiyyatına heç bir təsiri olmayacaq. Bakı-Tbilisi-Ceyhan boru kəməri Azərbaycanın iqtisadi sistemini kifayət qədər qoruyur. Azərbaycan enerji layihələrini şaxələndirib. Rusiyanın sözügedən kəmərin bağlanması ilə bağlı qərarı iki ölkə arasında münasibətləri daha da gərginləşdirə bilər”.

Tehsil-press.az