Son günlər Ukrayna mediasının da geniş yer ayırdığı bir münaqişə var. İki azərbaycanlı iş adamı arasında narazılıq yaranıb və bu getdikcə böyüyür.

Bunu Ukraynadakı diaspora fəalı Yalçın Qəhrəmanoğlu deyib.

Y.Qəhrəmanoğlu qeyd edib ki, 3 ildən çoxdur davam edən müharibədə Ukraynada yaşayan azərbaycanlılar özlərini bir toplum olaraq sübut etdilər:

“İndi adlarını qeyd edəcəyim iki şəxs də - Vaqif Abdullayev və Oktay Əfəndiyev - bu proseslərdə bacardıqlarını etdilər, Azərbaycan dövlətinin, xalqının adını yüksəltdilər. Amma indi çox təəssüf ki, bu ki azərbaycanlı arasında yaranmış münaqişədən yararlanmaq istəyənlər mövcuddur. Müharibədə Ukraynaya yardımları ilə bir çoxlarına nümunə olmuş Vaqif Abdullayevi “xain” çıxarıb, hətta ABŞ prezidenti Donald Trampla əlaqələrdə ittiham edirlər. Bunu edənlər bir məqamı unudurlar ki, müharibə ərəfəsində Ukraynada yaşayan hər kəsin həyatı, fəaliyyəti faktiki xüsusi xidmət orqanlarının süzgəcindən keçib. Kimin xainlik edib Ukraynadan qaçdığını da, kimin qorxusundan gizləndiyini də hər kəs bilir”.

Diaspora fəalımız ardınca bildirib: “Unutmayın ki, qeyri-ciddi ittihamlar onu yayanların özünü qeyri-ciddi adama çevirir. Bu üzdən qarşılıqlı ittihamdan, qara yaxmadansa, həm hüquqi, həm də insani olaraq məsələni birlikdə aydınlaşdırmaq lazımdır. Millətimizin, burdakı icmamızın nüfuzuna zərər gətirməkdənsə, birləşib güclənmək gərəkdir”.

Tehsil-press.az