"Tekfen"in fəaliyyətini SOCAR-la bağlamaq cəhdləri bu şirkətlərə qara yaxmaq məqsədi güdür. Bu barədə Tehsil-press.az-n sorğusuna cavabında SOCAR-ın mətbuat katibi Nizaməddin Quliyev deyib.O qeyd edib ki, Türkiyənin ən böyük holdinqlərindən biri olan "Tekfen"in bütün fəaliyyət istiqamətlərini SOCAR-la bağlamaq cəhdləri yalançı faktlar və rəqəmlərlə manipulyasiya edərək, bu iki şirkətə qara yaxmaq məqsədi güdür: "İndi həmin “fakt”lardan bir neçəsinə aydınlıq gətirim. Əvvəlcə Türkiyədən başlayaq. Türkiyədə Tekfen SOCAR-ın yox, "TANAP Co" Birgə Müəssisəsinin tenderlərindən birini qazanıb. TANAP Co-nun səhmdarları Azərbaycanın Cənub Qaz Dəhlizi Şirkəti, Türkiyənin BOTAŞ şirkəti və BP-dir. "Tekfen" elan olunmuş tenderlərdə dünyanın bir çox tanınmış şirkətləri ilə rəqabətə girərək 5 lotun yalnız birində tenderi udub. Göründüyü kimi, bu məsələdə SOCAR-ın hər hansı müdaxiləsi barədə ehtimallar yürütmək belə gülünc, yersiz və əsassızdır".
N.Quliyevin sözlərinə görə, iddia olunur ki, guya “Qazı Xəzər dənizindəki nəhəng Şahdəniz yatağından bütün Azərbaycan boyu daşıyacaq 122 sm diametrli qaz kəmərinin çəkilişi” layihəsi "Azfen" şirkətinə tapşırılıb və guya “SOCAR-ın Qaz Əməliyyatları Departamenti bu layihəyə rəhbərlik edib: "Əvvəla, SOCAR-ın Qaz Əməliyyatları Departamenti adlı strukturu mövcud deyil. SOCAR-ın Qaz İxrac İdarəsi var və deyilən məsələnin bu struktura heç bir aidiyyəti yoxdur. Heç layihənin adı da düzgün verilməyib. Söhbət Cənub Qaz Dəhlizinin bir hissəsi olan Cənubi Qafqaz Qaz Boru Kəmərinin genişləndirilməsi layihəsindən gedir. Məlumdur ki, bu layihənin də operatoru BP şirkətidir. Ümumiyyətlə deməliyəm ki, "Azfen" şirkəti tərəfindən onun mövcud olduğu 20 il ərzində Azərbaycanda həyata keçirilmiş layihələrin hamısı “Azəri-Çıraq-Günəşli” və “Şahdəniz” layihələri çərçivəsində olub. Bu şirkət həmin layihələri digər xarici şirkətlərlə konsorsiumlarda iştirak etməklə ciddi rəqabət şəraitində, ən əsası isə tenderlər yolu ilə qazanıb. Hamıya məlumdur ki, Azərbaycanda müstəqillik dövründə neft-qaz layihələrinin həyata keçirildiyi ilk illərdə bütün layihələrin iştirakçıları xarici şirkətlər arasından seçilirdi. O dövrdə ciddi layihələrin bir qayda olaraq xarici mütəxəssislər tərəfindən icra edildiyini nəzərə alanda "Azfen"in 20 il müddətində böyük bir mühəndis-tikinti şirkətinə çevrilməsi və xarici şirkətlərlə bir sırada regional əhəmiyyətli müxtəlif layihələrdə iştirak etmək səviyyəsinə yüksəlməsi Azərbaycan neft sənayesinin uğurlarından sayılmalıdır. Ona əsassız ittihamlarla qara yaxmaq isə yolverilməzdir".
Mətbuat katibi əlavə edib ki, "Azfen"in həyata keçirdiyi layihələrdə indiyə qədər minlərlə Azərbaycan vətəndaşına iş yeri açılıb, dövlətə böyük məbləğdə vergilər ödənilib: "Azfen"in həmin layihələrdən qazandığı mənfəətə gəlincə, bu barədə SOCAR-ın illik hesabatlarında ətraflı məlumat var. Lakin nədənsə bütün bunları nəzərə almaq istəməyiblər. Görünür, bu “araşdırma”nı aparanları və onların sifarişçilərini Azərbaycanda belə bir sanballı müəssisənin formalaşması ciddi şəkildə qıcıqlandırır və narahat edir".
Tehsil-press.az
