UNEC-in geniş tərkibdə nümayəndə heyəti Almaniyanın Siegen Universitetində səfərdədir.
UNEC və Siegen Universitetinin birgə reallaşdırdığı “EE-KEY-AZ Sahibkarlıq təhsili: Azərbaycanda iş yerlərinin yaradılması və məşğulluğun əsas amili kimi” layihəsi çərçivəsində həyata keçirilən səfərin məqsədi avropalı mütəxəssislərlə sahibkarlıq təhsili sahəsində fikir mübadiləsi aparmaqdır.
Eyni zamanda nümayəndə heyəti Siegendə təşkil olunan Sahibkarlıq Tədqiqatları üzrə Avropa Fənlərarası Konfransında iştirak edəcəklər. Konfransda Almaniya, Fransa, Portuqaliya, Niderland, İngiltərə və başqa ölkələrdən mütəxəssislərin iştirakı ilə müxtəlif istiqamətlər o cümlədən, akademik sahibkarlıq, karyera imkanlarının yaxşılaşdırılması, innovasiyalar və s. mövzular üzrə müzakirələr təşkil olunacaq.
Səfərdə UNEC-in Beynəlxalq əməkdaşlıq, Maliyyə və təminat departamentlərinin, Distant, qiyabi və əlavə təhsil mərkəzinin, Beynəlxalq iqtisadiyyat və Marketinq kafedralarının, SABAH mərkəzinin nümayəndələri iştirak edirlər.
Qeyd edək ki, hazırda Siegen Universitetində UNEC magistrlərinin Qış məktəbi davam edir.
Bu, “EE-KEY-AZ Sahibkarlıq təhsili: Azərbaycanda iş yerlərinin yaradılması və məşğulluğun əsas amili kimi” layihəsi çərçivəsində həyata keçirilən dördüncü Qış məktəbidir.
UNEC-in Beynəlxalq iqtisadiyyat kafedrasının müəllimi, dosent Sevər Məmmədovanın tədris etdiyi intensiv kurs magistrlərə sahibkarlıq sahəsində ən müasir biliklərin çatdırılması, təcrübə mübadiləsi, marketinq və beynəlxalq turizm kimi sahələrdə biliklərinin təkmilləşdirilməsinə xidmət edir. Bir həftə davam edəcək Qış məktəbində UNEC-lə yanaşı, Almaniyadan olan magistrlər də iştirak edir.

UNEC-in Mətbuat Xidməti