Bakı Ağır Cinayətlər Məhkəməsində qayınanasını xüsusi amansızlıqla öldürməkdə təqsirləndirilən Cavad İbrahimovun məhkəməsi başlayıb.
Hakim Eldar İsmayılovun icraatında olan prosesdə hazırlıq iclası keçirilib.
C.İbrahimov üzünü divara tutaraq istintaqın ədalətsiz aparılmasına etiraz edib: “Mənə qarşı çox haqsızlıq oldu, heç olmasa burada işimə ədalətli baxın”.
C.İbrahimov hakimin suallarına cavab verməkdən imtina edib.
Təqsirləndirilən şəxsin anket məlumatları dəqiqləşdirilib. Cinayət işi məhkəmə baxışına qəbul edilib.
Proses mayın 17-də davam etdiriləcək.
Qeyd edək ki, 2018-ci il yanvarın 11-də Yasamal rayonu "Qanlı göl” yaşayış massivinin ərazisində 1958-ci il təvəllüdlü yerli sakin Namazova Nigar Koroğlu qızının meyiti tapılıb. Namazovanın ailə üzvlərinin sözlərinə görə, o, yıxılaraq başının daşa dəyməsi nəticəsində dünyasını dəyişib. Ancaq məhkəmə tibbi ekspertizasının nəticələri bunun əksini deyib. Məlum olub ki, Namazova qətl qurbanı olub, onu boğaraq öldürüblər. Qatilin Namazova ilə eyni ünvanda yaşayan, əvvəllər məhkum olan kürəkəni olduğu ortaya çıxıb. Nəticədə 1983-cü il təvəllüdlü Ağdaş rayon sakini Cavad İbrahimov saxlanılıb.
O, istintaqa ifadəsində qayınanasını əxlaqsız təklifə görə öldürdüyünü deyib: “Qayınanam mənə təklif etdi ki, onunla sevişim. Mən də buna görə onu döydüm, öldürmək fikrim yox idi”.

Tehsil-press.az