Mayın 15-də Azərbaycan Dillər Universitetində (ADU) Azərbaycan ədəbiyyatı kafedrası və Azərbaycanşünaslıq elmi-tədqiqat laboratoriyasının birgə təşkilatçılığı ilə “Dilimiz və mənəviyyatımız” layihəsi çərçivəsində “Nizamiyyə Mədrəsəsi və onun azərbaycanlı nümayəndələri” adlı tədbir keçirilib.Tədbiri giriş sözü ilə açan Azərbaycan Milli Elmlər Akademiyasının (AMEA) Folklor İnstitutunun direktoru, ADU-nun Azərbaycan ədəbiyyatı kafedrasının müdiri akademik Muxtar İmanov iştirakçıları salamlayaraq Nizamiyyə Mədrəsəsi haqqında geniş məlumat verib. O, Nizamiyyə mədrəsələrinin, Böyük Səlcuqlar dövründə yarandığını və vəzir Nizammülkün adı ilə bağlı olduğunu qeyd edib. Muxtar İmanov Bağdad Nizamiyyə mədrəsəsinin orta əsrlərin ilk universiteti sayıldığını diqqətə çatdırıb. O, mədrəslərin eyni zamanda siyasi məqsədlərə xidmət edən, ideoloji mübarizəyə qoşulan bir təhsil sistemi olduğunu da sözlərinə əlavə edib. Xətib Təbrizi haqqında danışan M.İmanov onun Nizamiyyə mədrəsələri açıldıqdan sonra burada filologiyanı tədris etdiyini və mədrəsədəki məşhur kitabxananın rəhbəri olduğunu da vurğulayıb. O, mədrəsələrin təhsil sistemindən danışaraq burada təkcə dini mövuzlar deyil, eyni zamanda ədəbiyyat, tarix kimi dərslərin də tədris olunduğunu qeyd edib.
Azərbaycan Milli Elmlər Akademiyasının (AMEA) Dilçilik İnstitutunun direktoru, ADU-nun Azərbaycanşünaslıq ETL-nin aparıcı elmi işçisi Möhsün Nağısoylu islam mədəniyyəti ilə bağlı olan bu mövzunun olduqca aktual olduğunu bildirdib. O, İslam mədəniyyətinin yaranmasında ərəblərlə yanaşı, farslar və türklərin də rolu olduğunu vurğulayıb: “Nizamiyə mədrəsələrini öyrənmək mədəniyyət və tariximizi öyrənmək deməkdir”. O, İslam dünyasında mədrsələrin məscidlərin tərkibində fəaliyyət göstərdiyini söyləyib. M. Nağısoylu Nizamiyyə mədrəslərinin Nizammülkün təşəbbüsü ilə ideoloji mübarizə forması kimi əsl dini kadrlar yetişdirmək məqsədilə yarandıldığını sözlərinə əlavə edib.
Daha sonra Azərbaycan Milli Elmlər Akademiyasının (AMEA) Fəlsəfə və Hüquq İnstitutunun baş elmi işçisi Könül Bünyadzadə Nizamiyyə mədrəslələrinə yaranma ərəfəsi haqqında danışaraq İslam dinin özündə elm və ən xırda məişət detallarını ehtiva etdiyini söyləyib. O, İslam dinində həm də elmə çağırış olduğunu sözlərinə əlavə edib. O, Nizamiyyə mədrəsələrində dini elmlərlə yanaşı, dünyəvi elmlərin də tədris olunduğunu bildirib. K.Bünyadzadə bu mədrəsələrin kökündə maarifçiliyin dayandığını da vurğulayıb.
Tədbir müzakirələr şəklində davam edib.
ADU-nun Mətbuat Xidməti
