Təhsil Nazirliyi tərəfindən qiymətləndirmələrlə bağlı yeni hazırlanmış layihəyə əsasən, lisey, gimnaziya və tam orta təhsil səviyyəsi üzrə təmayülləşən siniflərdə məktəbin Pedaqoji Şurasının qərarı ilə Böyük Summativ Qiymətləndirmələr (BSQ) tətbiq edilən fənlərin sayı artırıla bilər.
Bunu Təhsil Nazirliyinin sektor müdiri Vidadi Bağırov bildirib.
Onun sözlərinə görə, əvvəlki qaydalarda bütün ümumtəhsil müəssisələri üzrə tələblər eyni idi.
V.Bağırov qeyd edib ki, Pedaqoji Şura ehtiyac duyulan daha bir necə fənn üzrə BSQ-nin keçirilməsi barədə qərar verə bilər:
“Yeni yanaşmalar hər bir məktəbə, o cümlədən də özəl məktəblərə öz imkanlarını daha da genişləndirmək imkanı verəcək. Özəl məktəblərə qiymətləndirmələrin aparılmasında sərbəstlik veriləcək. Özəl məktəblər qaydalardakı yeni yanaşmalara əlavələri TN ilə razılaşdırmaqla həyata keçirə bilərlər”.
V.Bağırov əlavə edib ki, yeni qaydalar layihəsində 1-ci siniflər üçün ümumiyyətlə summativ qiymətləndirmələrin keçirilməsi nəzərdə tutulmayıb. 2-3-cü siniflərdə yalnız Kiçik Summativ Qiymətləndirmələr (KSQ) keçiriləcək, BSQ-lər olmayacaq:
"Yeni yanaşmalarda hər təhsil səviyyəsinin sonunda bütün fənlərdən BSQ-lərin keçirilməsi nəzərdə tutulur. İbtidai təhsilin sonunda, yəni IV sinifdə, daha sonra IX sinifdə və XI sinifdə bütün fənlərdən BSQ-lər olacaq".

Tehsil-press.az