Sənaye və İnnovasiyalar üzrə Bakı Dövlət Peşə Təhsil Mərkəzinin bazasında Koreya təhsil standartları əsasında fəaliyyət göstərəcək Peşə Təhsil Mərkəzində tədris prosesinə cəlb olunan ixtisaslı mütəxəssislər üçün təlimlərə başlanılıb.
Koreyalı və yerli mütəxəssislər, eləcə də işəgötürənlərin nümayəndələri tərəfindən keçirilən təlimlərdə ümumilikdə 24 mütəxəssis iştirak edir.
Təlimlərdə kurikulumlar, modul yanaşma, peşə standartlarının rolu, əsas səriştələr, əsas pedaqoji anlayışlar, peşə təhsilində istehsalat təlimi və təcrübəsi barədə məlumat verilir, iştirakçıları maraqlandıran suallar cavablandırılır.
Təlimlərin noyabrın 16-dək keçirilməsi nəzərdə tutulur. Mütəxəssislər növbəti 3 ay ərzində Koreyada təlim keçəcək və mərkəzdə tətbiq olunacaq beynəlxalq standartlara uyğun yeni təhsil proqramını öyrənəcəklər.
Qeyd edək ki, təlimlər “Azərbaycanda peşə təhsili və təliminin inkişafına dair Strateji Yol Xəritəsi”nin icrası çərçivəsində peşə təhsili sisteminə ixtisaslı yeni mütəxəssislərin cəlb edilməsi istiqamətinə uyğun təşkil olunur.

Mətbuat Xidməti