Xəbər verdiyimiz kimi, bu gündən etibarən 2019-2020-ci tədris ili üçün elektron sistem vasitəsilə dövlət ümumi təhsil müəssisələrinin I sinfinə şagird qəbuluna start verilib. Təhsil eksperti Kamran Əsədov rus bölməsini seçən valideynlərin qarşılaşdığı bir neçə problemi vurğulayıb. Bilirib ki, keçən il 15 032 şagird rus bölmələrində təhsil almaq hüququ qazanmışdı, ancaq bu il rəqəm yüksək olsa, xeyli fəsadlar yaranacaq:
“Yəni 4500 məktəbin birinci sinifində 15 min yer var. Bundan sonra sistemdə yer yox idi. İndi birdən 50 min valideyin müraciət edib təsdiq alsa, 50 min şagird necə yerləşəcək? Hansı faktora üstünlük veriləcək? Təhsil Nazirliyində qohumu, dostu, tanışı işləməsi meyarı əsas götürüləcək?
Tam əksinə də ola bilər. Birdən 15 min olmadı, oldu 10 min, o zaman kifayət qədər rus bölməsində dərs deyən müəllim işini itirəcək. Çünki sinif komplekti formalaşmayacaq. Və ya birdən-birə 50 min uşaq müsabiqədən keçsə, sizin o qədər əlavə müəlliminiz varmı?”
Ekspertin sözlərinə görə, müsahibədən keçən uşaqlar üçün məktəblərdə boş yer qalmaya bilər:
“Çünki müsahibələr müxtəlif tarixlərdə olacaq. Bəzi uşaqlar aprelin əvvəli, bəzisi aprelin sonu müsahibəyə dəvət olunur. Bu zaman müsahibədən keçməsinə baxmayaraq onlar rus bölməsində təhsil ala bilməyəcəklər. Çünki yerlər daha əvvəlki tarixdə müsahibədən keçənlər tərəfindən dolacaq.
Məktəbə hazırlıq qruplarında oxuyanlar avtomatik olaraq 1-ci sinfə qəbul olur. Bu, rus bölməsinə də aiddir. Amma hansısa valideyn o məktəbi, o müəllimi istəyir, müsahibədən keçir, məlum olur ki, orda boş yer yoxdur. Çünki hansı məktəbdə rus bölməsinin olması, hansı müəllimin olması barədə məlumat yoxdur və ya məktəbəqədər təhsildən gələnlər tərəfindən tutulub.
Bundan başqa, məktəbə hazırlıqda Azərbaycan bölməsində oxuyan, indi sorğusunu dəyişənlərə çox ciddi problemlər yaranıb. Elektron sistem işləmir. İnsanlar övladlarının əvvəlki sorğusunu silib yenidən müraciət edə bilmirlər.
Qısası, Təhsil Nazirliyi uşaqların təhsil almaq hüququnu qanunvericilik aktlarını ciddi şəkildə pozaraq tamamilə əlindən alır”.
Tehsil-press.az
