Ermənistan tərəfindən əsir və girov götürülmüş vətəndaşlarımızın Azərbaycana qaytarılması onların ailə üzvləri ilə yanaşı, bütün Azərbaycan əhalisi üçün böyük sevincdir.
Bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib. O bildirib ki, Ermənistan tərəfi uzun müddət həmin şəxslərin qaytarılmasına razılıq vermirdi:
"Mən əvvəlcə bu məsələnin tarixinə getmək istəyirəm. Azərbaycan tərəfi bu məsələnin sülh yoluyla həlli prosesinə sadiq olaraq danışıqlarda iştirak edirdi və hər dəfə də etimad doğuran tədbirlərdən biri kimi bir - birinə inamını möhkəmləndirən addım kimi hamının - hamıya prinsipi ilə hər iki tərəfdə olan əsirlikdə, yaxud girovluqda olan insanların dəyişdirilməsi ilə bağlı müntəzəm təkliflər verirdi. Amma Ermənistan tərəfi buna qətiyyən razı deyildi, xüsusilə bu iki səxs - Şahbazla Dilqəmin məsələsi meydana çıxandan sonra bu məsələ bizim daim siyasi və ictimai gündəmimizdə olub".
B.Muradova deyib ki, bütün beynəlxalq tədbirlərdə cənab Prezident başda olmaqla digər nümayəndələrimiz bu məsələni hər dəfə gündəmə gətirib: "Münaqişə yerində onun humanitar tərəfi olan bu məsələni gündəlikdə saxlamağa və ciddi bir nəticə verən addım atmağa çagırışlar edilirdi. Beynəlxalq təşkilatlar, o cümlədən vasitəçilər də ən azı bu insanların işgəncələrini azaltmağa, onların ləyaqətli həyatlarını təmin etmək üçün hamının - hamıya prinsipi ilə dəyişdirilməsi təklifini ortaya qoyurdu. Amma bu günə qədər münaqişənin həllində irəliləyiş olmadığı kimi, bu məsələdə də hansısa bir hərəkətlənmə olmadı.
Komitə sədri bildirib ki, üçtərəfli formatda əldə olunan sənədin bütün bəndlərində yerinə yetirilən məsələlərin hamısında hərbi gücdən istifadə və digər istiqamətlərdəki möhkəm mövqeyinə bağlıdır: "Odur ki, ərazilərimizin işgaldan azad olunması, getdikcə sərhədlərimizin dəqiqləşdirilməsi və sənəddə nəzərdə tutulan, amma müəyyən vaxt tələb edən məsələlərin ardıcıl yerinə yetirilməsi Azərbaycan tərəfinin iradəsinə, qətiyyətinə, mövqeyinə və uğurlu fəaliyyətinə bağlıdır. Ona gorə də Dilqəm Əsgərovun, Şahbaz Quliyevin və onlarla bir yerdə azad olunaraq Azərbaycana gətirilən bu insanların özlərinin sevinci bir başqa məsələdir. Amma onların bu əziyyətlərinin bitməsi üçün çalışan, daim mövqeyini ifadə edən və bunu istəyən soydaşlarımızın sevinci bir başqadır. Bu, həm o insanları ailəsinə, cəmiyyətə qaytarmaq, Azərbaycan vətəndaşlarında özgüvəni artırmaq, öz dövlətinə, prezidentinə inamını artırmaq, bir də vətəndaşı olduğu dövlətin qüdrətli bir dövlət olduğunu hər vətəndaşının sağlamlığını, həyatını və təhlükəsizliyini təmin etməyə qadir olan bir ölkə olduğunu yenidən dərk etməyə imkan verir.
Əlbəttə ki, Ali Baş Komandana, Prezident ilham Əliyevə dərin təşəkkürümü və minnətdarlığımı bildirirəm. Nə qədər Azərbaycanda Heydər Əliyev siyasəti var və bu siyasəti həyata keçirən İlham Əliyev kimi qətiyyətli lider davam etdirir, Azərbaycan bütün problemlərini həll edəcək. Əminəm ki, bir neçə ildən sonra Azərbaycan ən qüdrətli dövlətlərdən biri olacaq. Bunun üçün də öz birliyimizə, həmin o dəmir yumruğa borcluyuq. Bundan sonra da əldə etdiklərimizi qorumaq, inkişaf etdirmək üçün hamı bu dəmir yumruqda özünü hiss etməlidir".

Tehsil-press.az