İngiltərəyə hava, dəmir və ya dəniz yolu ilə gələn şəxslər ən geci 72 saat əvvəl edilən koronavirus testinin mənfi cavabını təqdim etməli olacaqlar.
Bu barədə Böyük Britaniyanın Nəqliyyat Nazirliyinin bəyanatında deyilir.
Qurumun rəhbəri Qrant Şepps bildirib ki, hökumət bu addımı bütün dünyada, o cümlədən CAR və Danimarkada “COVID-19”a yoluxma riskini artıran koronavirusun yeni ştammının aşkar edilməsi nəticəsində atıb.
Qeyd edilir ki, tezliklə Şotlandiya, Uels və Şimali İrlandiya hökumətləri də oxşar tələb irəli sürə bilər.
Şeppsin sözlərinə görə, test cavabının mənfi olması “COVID-19”a yoluxma səviyyəsinin yüksək olduğu ölkələr siyahısından gələn sərnişinləri 10 günlük özünütəcrid dövrünə riayət etmək zərurətindən azad etmir. Bu siyahıda bir çox Avropa İttifaqı ölkələri, ABŞ, Çin və Rusiya var.
Cümə axşamı günü Böyük Britaniya hökuməti CAR-da koronavirusun yeni ştammının yayılması ilə əlaqədar yanvarın 9-dan etibarən bir sıra Afrika ölkələrindən (Namibiya, Zimbabve, Botsvana, Esvatini, Malavi, Lesoto, Mozambik və Anqola) Krallığa girişi qadağan edib.

Tehsil-press.az