“Qorqud” Vikipediya Metodik Klubunun könüllüləri və klubun eksperti Ayxan Zayıdzadə tərəfindən məqalələrin yaradılması prosesi davam etdirilir. Belə ki, onlayn ensiklopediyanın xarici dil bölmələrində Azərbaycanla bağlı yeni məqalələr yaradılıb və redaktə olunub. Eyni zamanda, Birinci və İkinci Qarabağ müharibəsi şəhidləri, elm, təhsil, mədəniyyət və siyasət sahəsində fəaliyyət göstərmiş şəxslər haqqında müxtəlif dillərdə onlarla məqalə yaradılıb və onlayn ensiklopediyada yerləşdirilib.
Bu barədə “Vikipediya” üzrə mütəxəssis, diaspor üzrə araşdırmaçı-ekspert Elnur Eltürk məlumat verib. O bildirib ki, könüllülər tərəfindən şair Fərhad İbrahimi haqqında türk, Təbriz bəylərbəyliyi, Abşeron xalçaçılıq məktəbi, “Quba” gəmisinin dənizçilərinə qoyulmuş abidə, Monolit bina, Birinci Nügədi kənd məscidi, professor Vaqif Sultanlı haqqında isə rus, tacik və ingilis dillərində məqalələr yaradılıb. Eyni zamanda, “Cırtdanın nağılı” özbək, ispan, portuqal, niderland və digər dillərdə yaradılaraq “Vikipediya”da yerləşdirilib.
Xatırladaq ki, “Qorqud” Vikipediya Metodik Klubu Milli Məclisin deputatı Elnur Allahverdiyevin təşəbbüsü ilə yaradılıb.

Tehsil-press.az