ABŞ Prezidenti Co Baydenin Administrasiyası eks-prezident Donald Tramp tərəfindən təyin olunmuş ABŞ hərbi akademiyalarının məşvərət şuralarının üzvlərinin könüllü şəkildə istefa vermələrini tələb edir.
Bu barədə CNN teleşirkəti mənbələrinə istinadən bildirib.
Onun məlumatına görə, müvafiq məktubları 11 nəfər alıb, onlardan bəziləri keçmiş amerikalı liderin administrasiyasında yüksək vəzifələr tuturdu. Xüsusilə söhbət Ağ Evin keçmiş mətbuat katibi Şon Spayser, Trampın keçmiş məsləhətçisi Kellien Konuey, həmçinin respublikaçının milli təhlükəsizlik məsələləri üzrə keçmiş köməkçisi Herbert Makmasterdən gedir. Onlar ötən ilin sonunda Trampın bir neçə digər tərəfdarı ilə yanaşı, respublikaçı tərəfindən ABŞ Hərbi Dəniz Qüvvələri, ABŞ Hərbi Hava Qüvvələri və ABŞ Hərbi akademiyalarının məşvərət şuralarının üzvləri təyin olunmuşdular.
CNN xəbər verir ki, Bayden Administrasiyası Tramp tərəfindən təyin edilmiş məsləhət şurasının üzvlərindən könüllü olaraq istefa verməyi tələb edir. Əks təqdirdə, onlar işdən azad olunacaqlar. Teleşirkətin məlumatına görə, müvafiq bildirişləri alan Tramp tərəfdarlarının bəziləri tutduqları vəzifədən getməkdən imtina etdiklərini, üç il müddətinə təyin olunduqlarını bildiriblər.
“Business Insider” nəşri isə öz növbəsində Ağ Evin mətbuat katibi Cen Psakiyə istinadən xəbər verir ki, bununla Bayden bu vəzifələrin ixtisaslı insanlar tərəfindən tutulmasına çalışır.

Tehsil-press.az