İtaliyanın Venesiya şəhərinin Mestre qəsəbəsində turistləri daşıyan avtobusun yerüstü keçiddən aşması nəticəsində azı 21 nəfər ölüb.
“La Linea” şirkətinə məxsus avtobus dəmir yolu xətti üzərindəki yerüstü keçiddə hərəkətdə olarkən təxminən 10 metr hündürlükdən aşağı düşüb və yanğın baş verib. Hadisə nəticəsində ikisi uşaq olmaqla, azı 21 nəfər ölüb, 12 nəfər yaralanıb, bir neçə nəfər itkin düşüb. Yaralılar təcili xəstəxanaya çatdırılıb. Təhlükəsizlik qüvvələri qəzanın başvermə səbəblərini araşdırır.
İtaliyanın Baş naziri Ciorcia Meloni hadisəyə görə narahatlığını ifadə edib, həlak olanların ailələrinə və yaxınlarına başsağlığı verib.
İtaliya Prezidenti Sercio Mattarella isə Venesiya meri Luici Bruqnaro ilə telefon danışığı zamanı hadisənin təfərrüatları barədə məlumat alıb.
Ağır yol qəzasına görə Venesiyada matəm elan edilib.

23:36

Venesiyada sərnişinləri daşıyan avtobus yerüstü keçiddən aşıb.
Hadisə yerinə xilasedicilər, polis və bir neçə təcili yardım briqadası cəlb olunub.
ANSA agentliyinin məlumatına görə, qəza dəmir yolu üzərində baş verib, Mestre ilə Venesiya arasında qatar hərəkəti dayandırılıb.
Venesiya meri bildirib ki, qəzada azı 20 nəfər həlak olub.

Tehsil-press.az