Elm və Təhsil Nazirliyinin (ETN) təşəbbüsü, Elm və Ali Təhsil üzrə Dövlət Agentliyi və Bakı Dövlət Universitetinin (BDU) birgə təşkilatçılığı, ETN-ə tabe qurumların, ali təhsil müəssisələrinin və elmi-tədqiqat institutlarının rəhbərlərinin iştirakı ilə görüş keçirilib.
Tədbiri açan BDU-nun rektoru Elçin Babayev qloballaşan dünyanın ali təhsil sistemində innovasiyaların tətbiqi ilə bağlı yeni yanaşmalar tələb etdiyini bildirib. Rektor qeyd edib ki, hər bir ölkənin ictimai, siyasi, iqtisadi, hərbi təhlükəsizliyi üçün milli kadrlara böyük ehtiyac var. Bu baxımdan keçirilən tədbir ali təhsil müəssisələri və elmi-tədqiqat institutları üçün mühüm əhəmiyyət daşıyır.
Elm və Ali Təhsil üzrə Dövlət Agentliyinin İdarə Heyətinin sədri Ülkər Səttarova da tədbirin önəminə diqqət çəkərək, ali təhsilin elmsiz mümkün olmadığını vurğulayıb. O, rəhbərlik etdiyi qurumun ölkədə elm və təhsilin daha da inkişaf etdirilməsi və elmin maliyyələşməsinin mexanizmləri üzərində çalışdığını diqqətə çatdırıb.
Tədbirdə fizika-riyaziyyat elmləri doktoru, Dövlət mükafatı laureatı, Əməkdar elm xadimi, Türkiyənin Bilkənt Universitetinin professoru Əmirulla Məmmədov “XXI əsrdə Azərbaycanın ali təhsil sistemi və innovasiyalar” mövzusunda məruzə ilə çıxış edib. Azərbaycanda ali təhsilin bu günü və gələcəyindən bəhs edən professor bildirib ki, dünyada təhsil həm fərdləri, həm də cəmiyyəti yenidən formalaşdırmaq üçün ən güclü alətlərdən biridir: “Dünyanın harasında yaşamağımızdan asılı olmayaraq, təhsil vacibdir, çünki yeni şeylər öyrənməyimizə, dünyanı daha yaxşı anlamağımıza və gələcəkdə inkişaf imkanımızın yüksəlməsinə kömək edən vasitədir”.
Məruzəçi dünyada ən yaxşı ali təhsil sisteminə malik ABŞ, Böyük Britaniya, Avstraliya, Kanada, Yeni Zelandiya, İrlandiya və İsveç kimi ölkələrin təcrübələrini bölüşüb. Qeyd edib ki, universitetlərin elmi fəaliyyəti onun nüfuzunun göstəricilərindən biridir. Universitet nə qədər çox tədqiqat aparsa, onun şöhrəti də bir o qədər yüksək olur. Nüfuzlu universitet təkcə büdcə və elmi nəşrlərin sayı kimi obyektiv amillərə görə deyil, kampus həyatı ilə də liderlik əldə etməlidir.
Daha sonra alim dünya təhsil sistemlərindəki təhsil tipləri və müasir universitet modelləri (Almaniya, Böyük Britaniya universitetlərinin timsalında) haqqında fikirlərini dinləyicilərin diqqətinə çatdırıb və Azərbaycanın ali təhsil sisteminin inkişafı üçün təkliflərini səsləndirib. Azərbaycanda 4 fərqli universitet modeli yaratmağı təklif edən alim bildirib ki, ölkədə xüsusi statusu, fərqli büdcəsi və muxtariyyətı olan Dövlət Əhəmiyyətli Tədqiqat Universitetinin (DƏTU) yaradılması ali təhsilin inkişafına töhfə verə bilər. Bu cür universitetlər özlərinin bənzərsiz imicini formalaşdıra bilərlər. Bu da onlara elmi-təhsil və ideya potensiallarını ortaya qoyaraq, cəmiyyətin, ölkənin həyat keyfiyyətini ucaldan və milli iqtisadi sabitliyə töhfə verən yeni yüksək texnoloji proseslərin, məhsulların yaradılmasında liderlik etməyə imkan yaradar.
Daha sonra Milli Məclisin Elm və təhsil komitəsinin sədri Bəxtiyar Əliyev, Molekulyar Biologiya və Biotexnologiyalar İnstitutunun baş direktoru İradə Hüseynova, Neft-Kimya Prosesləri İnstitutunun baş direktoru Vaqif Abbasov, Azərbaycan Respublikasının Prezidenti yanında Ali Attestasiya Komissiyasının Aparat rəhbəri Gülarə Tağızadə, Sumqayıt Dövlət Universitetinin rektoru Rüfət Əzizov, Azərbaycan Dövlət İqtisad Universitetinin prorektoru Neman Muradlı, Aşqarlar Kimyası İnstitutunun baş direktoru Vaqif Fərzəliyev, Dövlət Gömrük Komitəsinin Akademiyasının rektoru Qulu Novruzov mövzu ilə bağlı fikirlərini bildiriblər.

Tehsil-press.az