Naxçıvan Dövlət Universitetinin nəzdində fəaliyyət göstərən İngilis dilli Təmayüllü Gimnaziyanın 10-cu sinif şagirdi Hüseyn Tahirov VII Respublika Robot Olimpiadasının “Robosports” kateqoriyasında I yerin qalibi olub.Bakı şəhərində yerləşən Milli Gimnastika arenasında 20-22 sentyabr tarixlərində keçirilən yarış, Gənclər və İdman Nazirliyi, Dünya Robot Olimpiadası Assosiasiyası və Azərbaycan Robotexnika Mühəndisliyi Akademiyasının (AREA) birgə təşkilatçılığı ilə baş tutub. Olimpiada ölkə üzrə gənclərin texnoloji bilik və bacarıqlarını nümayiş etdirmək, robotexnika sahəsində gələcək mütəxəssisləri yetişdirmək üçün böyük bir platformadır.
Hüseyn Tahirov bu mühüm uğuru ilə yalnız Naxçıvan Dövlət Universitetinin nəzdində fəaliyyət göstərən İngilis dilli Təmayüllü gimnaziyanın adını yüksəltməklə kifayətlənmədi, eyni zamanda Azərbaycanı beynəlxalq arenada təmsil etmək hüququ qazandı. O, 2024-cü ildə İzmir şəhərində keçiriləcək Dünya Robot Olimpiadasında “Robosports” kateqoriyası üzrə ölkəmizi təmsil edəcək. Bu beynəlxalq yarış, dünyanın müxtəlif ölkələrindən ən yaxşı robotexnika mühəndislərinin və texnologiya həvəskarlarının bir araya gəldiyi möhtəşəm bir tədbirdir.
Hüseyn Tahirovun bu uğuru, onun texnologiyaya olan marağı və yaradıcı yanaşmalarının nəticəsidir. O, yarış boyu innovativ düşüncəsini və robotların hərəkət mexanizmlərini dəqiqliklə idarə etmək bacarığını nümayiş etdirərək, ən çətin rəqiblər arasında birinci yeri tutmağa nail oldu. Bu qələbə həm də Naxçıvan Dövlət Universitetinin nəzdində fəaliyyət göstərən İngilis dilli Təmayüllü gimnaziyanın texnologiya və innovasiya yönümlü tədris proqramlarının uğurlu nəticəsi kimi dəyərləndirilməlidir. NDU-nun nəzdində fəaliyyət göstərən Gimnaziyanın təhsil strategiyaları, gənclərin texnologiya sahəsində potensialını üzə çıxarmağa və onları beynəlxalq səviyyədə rəqabətə hazır vəziyyətə gətirməyə yönəlib.
İzmirdə keçiriləcək Dünya Robot Olimpiadasında Hüseyn Tahirovun ölkəmizi layiqincə təmsil edəcəyinə əminik. Hüseyn Azərbaycan gənclərinin texnoloji və mühəndislik sahələrində dünya səviyyəsində tanınan bir qüvvə olduğunu bir daha sübut edəcək.
Tehsil-press.az
