Manatın məzənnəsinin dəyişməsi, viza rejimində tətbiq edilən dəyişikliklər, eləcə də Mədəniyyət və Turizm Nazirliyi tərəfindən aparılan təbliğat kampaniyası sayəsində bu yay ərzində Azərbaycana gələcək turistlərin sayı ötən ildəkilərdən çox olacaq.

Bunu Tehsil-press.az-a Azərbaycan Turizm Assosiasiyasının (AzTA) sədri Nahid Bağırov bildirib. Onun sözlərinə görə, bu yay Azərbaycana turistlərin əsasən Rusiyadan, ərəb ölkələrindən cəlb edilməsi üçün işlər aparılır: "Biz bu istiqamətdə ölkəyə çoxlu sayda turist cəlb edirik. Ərəb ölkələrində yayda hava çox isti keçir. Bu müddətdə ərəb ölkələrində yaşayanlar havası daha normal olan başqa ölkələrə getməyə çalışırlar. Biz bu yay aylarında ərəb ölkələrindən turistləri Azərbaycana cəlb etməyi nəzərdə tuturuq".
N.Bağırov deyib ki, rusiyalı turistlər müəyyən proseslərə görə, daha çox istirahət etdikləri Misirə, Türkiyəyə, bəzi Avropa ölkələrinə artıq gedə bilmirlər: "Rusiya üçün öz vətəndaşlarının Rusiya daxilində istirahət etməsi prioritetdir, onlar Socidə istirahət etməyə böyük üstünlük verirlər. Amma bütün Rusiya vətəndaşları təbii ki, istirahət etmək üçün Sociyə yerləşə bilməz. Bu baxımdan rusiyalı turistlərin bir hissəsi istirahət etmək üçün Azərbaycana gələcək".
Bu gün Azərbaycanın Ukrayna, Qazaxıstan, Türkiyə vətəndaşları üçün turizm baxımından prioritet olduğunu deyən N.Bağırov sadalanan ölkələrin, eləcə də Rusiyanın turistlərinin Azərbaycana maraq göstərdiklərini açıqlayıb.
İrandan da Azərbaycana çox sayda turistin gəldiyini söyləyən assosiasiya sədri əlavə edib ki, bu gün Azərbaycan qiymət baxımından istirahət etmək üçün çox sərfəli ölkədir.
Xaricdən Azərbaycana gələn turistlərin də bu qənaətdə olduqlarını deyən assosiasiya sədri deyib ki, manatın devalvasiyasından sonra xaricdən Azərbaycana gələn turistlər ödənişlərini dollarla həyata keçridiklərindən ölkəmizdəki xidmətlərin qiymətləri onlara çox ucuz başa gəlir: "Məsələn, Azərbaycanda ən populyar olan "Four Seasons Baku" hotelində 1 günlük qalmaq təqribən 160 dollara başa gəlir. Dünyada "Four seasons" hoteli üçün bu qiymət yoxdur. Eyni hal digər 5 ulduzlu brend hotellərə də aiddir. Dünyada 5 ulduzlu brend hotellərdə qalmaq xərci çox yüksəkdir. Ancaq Azərbaycanda manatın məzənnəsinin dəyişməsi ilə əlaqədar ölkəyə gələn turistlər üçün əlverişli vəziyyət yaranıb".
AzTA sədri deyib ki, bu əlverişli vəziyyət yalnız qalmaq deyil, həm də qidalanma xərcləri ilə də bağlıdır: "Manatın məzənnəsinin dollara nisbətən enməsindən sonra bəzi restoranlar qiymətləri bahalaşdırdılar. Amma bu da 10-15 faizdən yüksək olmadı. Bu gün xarici turistə dollarla nəyi isə ödəmək çox ucuz, əlverişlidir".
N.Bağırovun sözlərinə görə, Azərbaycan bir sıra ölkələr üçün viza rejimini ləğv edib, bəzi Fars körfəzi ölkələri və Çin, Yaponiya, Koreya, Malayziya, Sinqapurdan ölkəmizə gələn turistlər üçün isə viza rejimi sadələşdirilib.
Assosiasiya sədri qeyd edib ki, bu güzəştlər Avropadan gələn turistlərə şamil olunmasa da, onlara vizanın verilməsi onlayn rejimdə həyata keçirilir. Artıq elektron vizalar turistlərə 5 iş günü müddətində verilir.

Tehsil-press.az