
Milli Məclisin deputatı Fazil Mustafa bildirib ki, Ağsaqqallar Şurası ümumilikdə normal fəaliyyət göstərir və öz işinin öhdəsindən gəlməyi bacarır:
“Rayonlarda bu cür epizodlar ola bilər. Burada xüsusi ajiotaj yaratmağa ehtiyac yoxdur. Əgər bu məntiqlə yanaşsaq, ümumiyyətlə, 9 May Qələbə Gününü qeyd etməməliyik. Bu gün siyasi baxımdan həmrəylik rəmzi kimi qəbul edilir. Lakin mahiyyət etibarilə 9 Mayda Azərbaycan xalqı ciddi itkilər verib. Sovet ordusu tərəfindən azərbaycanlıların hazırlıqsız şəkildə döyüşə göndərildiyinə dair kifayət qədər faktlar mövcuddur. Buna baxmayaraq, ümumi qələbənin bir hissəsi kimi tariximizdə bu günü qeyd edirik”.
Deputatın fikrincə, bu gün “Georgi lenti” və SSRİ bayrağı Azərbaycan üçün birbaşa təhlükə yaratmır:
“Əslində, bu gün üçün əsas təhlükə dini xurafatla bağlı müxtəlif mənbələrdən gələn təhdidlərdir. Bu məsələlərin üzərinə ciddi şəkildə getmək lazımdır. Həmin bölgələrdə gündəmə gələn bu kimi epizodlara da səssiz qalmaq düzgün deyil. 9 Mayda bəzi yürüşlər keçirilir və bu, insanlara fərdi olaraq müəyyən emosional bağ yaşadır. Kiminsə babası, yaxınları həmin dövrdə həlak olubsa, onların bu günü qeyd etməsi başa düşüləndir. Amma qeyd etməliyik ki, bu tarix sovet sisteminə bağlı olduğundan, mahiyyətcə biz artıq bundan uzaqlaşmalı idik”.
Tehsil-press.az