Son həftələrdə Ermənistanın Gümrü bölgəsindəki 102-ci bazasına çox sayda hərbi texnika və sursat gətirilməsi regionda narahatlıqla qarşılanıb. Məlumata görə, hər gün Rusiyadan Ermənistana silah dolu bir neçə yük təyyarəsi enir. Rəsmi açıqlama olmasa da, bu vəziyyət müxtəlif iddialara səbəb olub. Bəziləri bu silahlanmanı Moskvadan İrəvana hərbi çevriliş planı ilə əlaqələndirir. Ermənistan hakimiyyətinin susqunluğu isə sualları daha da artırır.Rusiyanın bu hərbi hərəkətliliyi Cənubi Qafqazda yeni gərginliyin başlanğıcı ola bilərmi? Rusiya Ermənistanda çevrilişmi planlaşdırır? Və ya məqsədi nədir?
Politoloq Məhəmməd Əsədullazadə deyib ki, sözügedən proses Moskvanın Cənubi Qafqazdakı hərbi mövqelərini gücləndirməyə yönəlmiş addımdır:
“İrəvan və Kreml arasında siyasi böhran yaşanır. Hazırkı vəziyyət həm Ermənistan, həm də Azərbaycana əzələ nümayişi olaraq qiymətləndirilə bilər. Bu ölkə Ukraynaya qarşı dünyanın gözü önündə müharibə aparırsa, eyni addımları Ermənistanda da atması mümkündür. Gümrüdəki bazada hərbi çevriliş baş verə, bu halda revanşist qüvvələr hakimiyyətə gələrək Bakıya qarşı müharibə elan edə bilərlər. Kremldən hər şey gözlənilir. Əgər Rusiya belə bir addım atsa, qarşısında Türkiyəni, Böyük Britaniyanı və Pakistanı görəcək”.
Politoloq qeyd edib ki, Rusiyanın Cənubi Qafqazda geo-rəqabət şəraitində Gümrüdəki hərbi bazalarını möhkəmləndirməsi yeni bir rəqabətə hazırlıqdır:
“Ermənistan Zəngəzur dəhlizinə nəzarəti Rusiyaya vermək istəmir. Bu, regionda yeni gərginlik yarada bilər. Digər tərəfdən, İrəvan anti-Rusiya siyasətini davam etdirir. Seçkilərin yaxınlaşması ilə paralel olaraq, Ermənistandakı revanşist müxalifət də aktivləşib və Moskvadan dəstək gözləyirlər. Proseslər ciddi şəkildə inkişaf edir və görünür, Rusiyanın bütün kartları əldən çıxdığı üçün artıq Gümrüdə və Ermənistandakı siyasi prosesləri idarə etməyə başlayacaq. Təbii ki, Kreml qoşun birləşmələrini Zəngəzura da yerləşdirə bilər. Yəni baş verə biləcək heç bir ehtimalı istisna etmirəm. Çünki Rusiya zəiflədikcə daha da aqressiv və azğın siyasət yürüdür”.
Tehsil-press.az
