Türkiyə ABŞ ilə münasibətləri yaxşılaşdırmaq və Amerika F-35 qırıcı təyyarələrini əldə etmək üçün S-400 hava hücumundan müdafiə raket sistemini Rusiyaya qaytarmaq istəyir.

Bu barədə Bloomberg yazıb.

Amerika xəbər agentliyi öz mənbələrinə istinadən yazır: "Türkiyə prezidenti Rəcəb Tayyib Ərdoğan ötən həftə rusiyalı həmkarı Vladimir Putinlə görüşündə S-400 sistemləri məsələsini qaldırıb. Bu, iki ölkənin rəsmiləri arasında əvvəllər aparılan oxşar müzakirələrdən sonra baş verib".

Haberler.com saytının yazdığına görə, Türkiyə təxminən on il əvvəl Rusiyadan aldığı S-400 hava hücumundan müdafiə raket sistemlərinin Rusiyaya qaytarılmasını istəyir.

Ankara ümid edir ki, bu addım ABŞ və digər NATO üzvləri ilə münasibətlərini gərginləşdirən mübahisəli razılaşmaya son qoyacaq.

Nəticədə, Türkiyə hökumətinin planına görə, bu, Türkiyəyə uzun müddətdir ümid etdiyi Amerika F-35 gizli qırıcı təyyarələrini əldə etməyə imkan verəcək.

Amerikalı jurnalistlərin məlumatına görə, Türkiyənin S-400 raketləri məsələsi və F-35 proqramında iştirakını bərpa etmək istəyi Ərdoğanın sentyabr ayında Ağ Evdə Trampla görüşü zamanı müzakirə olunub. Bu arada, ABŞ-ın Türkiyədəki səfiri Tom Barrak Ankaranın "S-400-dən imtina etməyə daha yaxın olduğunu" bildirərək, məsələnin dörd-altı ay ərzində yekunlaşdırılacağını vəd etmişdi.

Daha əvvəl mediada Türkiyənin ödədiyi F-35-lərin ABŞ-da boş dayandığı bildirilirdi.

Tehsil-press.az