Azərbaycan Prezidenti İlham Əliyev Azərbaycan diasporunun inkişafında və xalqlar arasında dostluğun möhkəmləndirilməsi sahəsində xidmətlərinə görə bir qrup şəxsin təltif edilməsi haqqında Sərəncam imzalayıb. Sərəncama əsasən, Məsud Aşina “Şöhrət” ordeni ilə təltif edilib.

Məsud Aşina – Azərbaycan əsilli danimarkalı nevroloq və beynəlxalq səviyyəli alimdir. O, Bakı şəhərində 29 dekabr 1965-ci ildə anadan olub. 1988-ci ildə Azərbaycan Tibb Universitetini bitirdikdən sonra Danimarkada ali təhsilini davam etdirərək Kopenhagen Universitetində nevrologiya üzrə rezidentura, eləcə də PhD və DMSc doktorluq dərəcələrini əldə edib. Hazırda Aşina Kopenhagen Universitetinin Nevrologiya professoru və Kopenhagen Universitet Xəstəxanası – Rigshospitaletdə baş məsləhətçi kimi fəaliyyət göstərir. O, həmçinin İnsan Miqreni Araşdırma Birliyinin direktoru və bir sıra nüfuzlu beynəlxalq nevrologiya təşkilatlarında rəhbər vəzifələrdə olub.

Alimin elmi fəaliyyəti baş ağrısı və miqren sahəsində tədqiqatlarla bağlıdır və o, bu sahədə dünyanın aparıcı ekspertlərindən biri hesab edilir. Onun elmi işləri beynəlxalq jurnallarda yüzlərcə məqalə və araşdırma kimi dərc olunub.

Məsud Aşina “YAŞAT” Fondunun Himayəçilik Şurasının üzvüdür. O, bu vəzifədə Vətən müharibəsi zamanı yaralanan qazilərin müalicə prosesində, ağır yaralıların müayinə və dəstək proqramlarında iştirak edib və müvafiq mütəxəssislərlə birlikdə yaralılarla birbaşa işləyib.

Bundan əlavə, Aşina 2020-ci ildə Prezidentin sərəncamı ilə “YAŞAT” Fondunun Müşahidə Şurasına üzv təyin edilmiş və bu vəzifədə dövlətdənkənar yardım təşəbbüslərində də rol oynayıb.

Dövlət Sərəncamına əsasən, Məsud Aşinadan başqa bir qrup şəxs də dövlət mükafatlarına layiq görülüb: Cahangir Novruzov “Azərbaycan Respublikası Prezidentinin fəxri diplomu”, Ziya Zakir Acar “Dostluq” ordeni ilə, Akif Alaferdov, Xəlil Kələntər, Sevinc Kərimova, Fəridə Pənahova, Bəxtiyar Siracov və Xədicə Zeynalova isə “Tərəqqi” medalı ilə təltif ediliblər.

Tehsil-press.az