4 mart 2026-cı il tarixində Azərbaycan Respublikası Elm və Təhsil Nazirliyi Polimer Materialları İnstitutunda Gənc Alim və Mütəxəssislər Şurası (GAMŞ) 8 Mart - Beynəlxalq Qadınlar Günü münasibəti ilə tədbir keçirib. Tədbiri giriş sözü ilə GAMŞ-ın sədri, Poliefir və polikarbonat materiallar laboratoriyasının kiçik elmi işçisi Günel Qurbanlı açaraq gəncləri təbrik edib, elmi fəaliyyətlərində müvəffəqiyyətlər arzulayıb. O, Azərbaycan qadınının bütün dövrlərdə öz istedadı, zəkası, iradəsi və əzmi ilə milli - mənəvi dəyərlərimizin qorunub saxlanması və yaşadılmasında müstəsna xidmətlərdən danışıb.

Daha sonra GAMŞ-ın üzvləri - Polimerlərin mexaniki-kimyəvi modifikasiyası və emalı laboratoriyasının еlmi işçisi Sevda Abdalova və Nanopolimer kompozitlər laboratoriyasının kiçik elmi işçisi Aidə Dünyamalıyevanın çıxışları dinlənilib. Məruzəçilər xalqımızın çoxəsrlik zəngin irsinin yaşadılmasında, dilimizin saflığının qorunub saxlanılmasında analarımızın müstəsna xidmətlərindən bəhs edib, Azərbaycan qadınının güclü iradəsi, vətənpərvərliyi və fədakarlığı ilə seçilərək yurdun mübarizə salnaməsində silinməz izlər qoyduğunu vurğulayıblar. Azərbaycan Xalq Cümhuriyyətinin Şərq aləmində ilk dəfə qadınlara seçmək və seçilmək hüququ verməsi cəmiyyətin inkişafında, taleyüklü məsələlərin ədalətli həllində qadınların fəaliyyətinin layiqincə qiymətləndirilməsinin nəticəsidir.

Tehsil-press.az