Böyük Britaniya hökuməti “yüksək risk” kateqoriyalı 30 ölkədən Krallıq ərazisinə daxil olan insanları mehmanxanalarda təcrid olunmağa məcbur edəcək.
Bu barədə “The Times” qəzeti mənbələrinə istinadən xəbər verib. Nəşrin yazdığına görə, bununla bağlı rəsmi qərar gün ərzində açıqlanacaq.
Belə bir radikal tədbirin köməyi ilə hakimiyyət ölkəyə koronavirusun yeni və potensial olaraq daha təhlükəli genetik variantlarının gətirilməsi riskini azaltmaq niyyətindədir. İlkin olaraq “yüksək risk” kateqoriyasına düşəcək dövlətlər arasında Braziliya və Cənubi Amerikanın bir sıra digər ölkələri, CAR və onunla həmsərhəd ölkələr, Portuqaliya, həmçinin Kabo-Verde ada dövləti var. Planetin digər nöqtələrində virusun yeni ştammlarının yayılacağı təqdirdə siyahı genişlənəcək.
Hazırda bu dövlətlərin bir çoxu ilə Böyük Britaniya arasında gediş-gəliş məhdudlaşdırılıb, sözügedən ölkələrdə son 10 gün ərzində olanlar üçün isə Krallıq ərazisinə giriş qadağandır. Sonuncu məhdudiyyət Britaniya vətəndaşları, müvəqqəti yaşayış icazəsi və uzunmüddətli viza sahiblərinə aid deyil.

Tehsil-press.az