Azərbaycan Dövlət Pedaqoji Universitetində (ADPU) Frankofoniya Universitet Agentliyinin (AUF) Mərkəzi və Şərqi Avropa üzrə regional direktoru Mohamed Ketata və Azərbaycan Dövlət Neft və Sənaye Universitetinin nəzdində Azərbaycan-Fransız Universitetinin (UFAZ) icraçı direktoru dosent Vazeh Əskərovla görüş keçirilib.
Görüşdə ADPU-nun rektoru professor Cəfər Cəfərov rəhbərlik etdiyi ali təhsil ocağının tarixi, fakültələri, filialları, fəaliyyət istiqamətləri və ikili diplom proqramı haqqında məlumat verib. Rektor universitetdə xarici dillərin, o cümlədən fransız dilinin tədrisi sahəsində aparılan islahatlardan da bəhs edib.
V.Əskərov UFAZ ilə AUF arasında əməkdaşlığın hazırkı vəziyyəti barədə məlumat verib. O, UFAZ-da Bakı Frankofoniya Məşğulluq Mərkəzinin açılacağını diqqətə çatdırıb.
Sonda M.Ketata ADPU-da olmaqdan məmnunluğunu bildirib, Frankofoniya Universitet Agentliyinin missiyası, fəaliyyəti və universitetlərlə əməkdaşlığı barədə məlumat verib.
Görüş zamanı ADPU-nun Frankofoniya Universitet Agentliyinə üzv olması barədə razılıq əldə edilib.

Tehsil-press.az