Təhsil eksperti: “Cənab Prezidentin seçki platformasında mühüm əhəmiyyət verilən prioritet istiqamətlərdən biri kimi təhsildə qarşıya qoyulan hədəflərə nail olunacaq”

2024-cü il fevralın 7-də keçirilmiş Azərbaycan Respublikasında Prezident seçkilərində Yeni Azərbaycan Partiyasının namizədi cənab İlham Əliyevin qalib gəlməsinin əsas səbəbi 2003-cü ildə Azərbaycan Respublikasının Prezidenti seçildikdən sonra cənab İlham Əliyevin rəhbərliyi ilə xalqımız misilsiz nailiyyətlərə imza atması olmuşdur. Son 20 ildə həyata keçirilmiş ardıcıl və məqsədyönlü siyasi kurs ölkəmizin sürətli və dayanıqlı inkişafını, güclü iqtisadi potensialın formalaşmasını, müasir cəmiyyət quruculuğunu, vətəndaşların rifahını, təhlükəsizlik və müasir ordu quruculuğu kimi məsələlərin effektiv həllini təmin etmiş, ölkəmizin beynəlxalq nüfuzu yüksəlmiş, dünyada strateji əhəmiyyəti artmışdır. 2020-ci il sentyabrın 27-də Ermənistanın davamlı hərbi təxribatlarına cavab olaraq başlanmış Vətən müharibəsində əldə edilmiş tarixi Zəfər və 2023-cü il sentyabrın 19-20-də həyata keçirilmiş lokal xarakterli antiterror tədbirləri nəticəsində 30 il ərzində xalqımızın qarşısında duran ən mühüm problem - Azərbaycan Respublikasının suverenliyinin və ərazi bütövlüyünün tam bərpası məsələsi həll edilmişdir.

Təbii ki, xalqımız bu uğurların davam etməsini istəyir. Lakin xalqın cənab İlham Əliyevə səs verməsinin yeganə səbəbi yalnız onun Azərbaycan naminə elədiklərinə minnətdarlığının ifadəsi deyildir. Seçicinin qərarına namizədin həm də verdiyi vədlər, eləcə də əvvəlki vədlərə nə dərəcədə sadiqliyi əhəmiyyətli dərəcədə təsir edir. İlham Heydər oğlu Əliyevin bir il əvvəl seçicilərinə verdiyi vədlər onun seçki platformasında öz əksini tapıb. Təhsil üzrə tanınmış ekspert, Təhsil-press.az” İnformasiya Agentliyinin direktoru Əkbər Hüseynzadənin fikrincə, cəmiyyətin elə bir zümrəsi yoxdur ki, platformada diqqətdən kənarda qalmış olsun:

“Sənəddə mühüm əhəmiyyət verilən prioritet istiqamətlərdən biri də təhsildir. Belə ki, həmin platformada 2024-2031-ci illərdə təhsil sahəsində aşağıdakı hədəflərə nail olunması qarşıya məqsəd qoyulmuşdur: Hər bir vətəndaşın innovativ, müasir təhsilə və elmə çıxışı üçün dövlət dəstəyinin artırılması; Ölkədə bütün növ təhsil infrastrukturunun və kadr bazasının gücləndirilməsi, bu əsasda təhsil xidmətləri ixracının dəstəklənməsi; Bütün təhsil ocaqlarında tədqiqat mühitinin gücləndirilməsi, tədqiqat sahəsində nəşrlərin nüfuzunun artırılması; Elmi kəşflərin sənayeləşdirilməsinin təşviqi, məhsul və xidmətlər ixracında texnologiyanın tam milliləşdirilməsinə nail olunması; Təhsilin bütün səviyyələrində təhsilalanlara rəqəmsal biliklərin aşılanması, təhsil müəssisələrində İKT əsaslı infrastrukturun inkişaf etdirilməsi.

Yeri gəlmişkən, Prezident İlham Əliyevin seçki platformasında 2024-2031-ci illərdə gənclər siyasəti sahəsində nail olunması nəzərdə tutulan hədəflər sırasında gənclərin elmə və təhsilə həvəsləndirilməsi də mühüm bəndlərdən biri kimi göstərilib. Elm və təhsil sahəsində son dövrlər start götürən islahatların gedişatı əmin olmağa əsas verir ki, qarşıya qoyulan hədəflərə nəzərdə tutlan vaxt ərzində nail olunacaq”.

Təhsil-press.az
İnformasiya Agentliyi