Beynəlxalq Diaspor Mərkəzi (BDM) 30 mart 2025-ci il tarixində 31 Mart – Azərbaycanlıların Soyqırımı Günü ilə əlaqədar olaraq Quba Soyqırımı Memorial Kompleksini ziyarət edəcəkdir. Bu ziyarət, 1918-ci ildə erməni daşnak-bolşevik silahlı dəstələrinin xalqımıza qarşı törətdiyi qanlı soyqırımı aktlarını anmaq, tarixi həqiqətləri bir daha xatırlatmaq və şəhidlərin əziz xatirəsini yad etmək məqsədi daşıyır.

1918-ci ilin mart ayında baş verən bu faciə Azərbaycan xalqına qarşı törədilmiş sistemli soyqırımı siyasətinin tərkib hissəsi olmuşdur. Bakı, Şamaxı, Quba, Qarabağ, Zəngəzur, Naxçıvan və digər bölgələrdə minlərlə günahsız insan, o cümlədən qadınlar, uşaqlar və yaşlılar amansızcasına qətlə yetirilmiş, kəndlər yandırılmış, tarixi-mədəni irsimiz məhv edilmişdir. Xüsusilə, Quba bölgəsində aşkarlanan kütləvi məzarlıqlar erməni vandalizminin miqyasını və vəhşiliyini açıq şəkildə sübut edir.

Beynəlxalq Diaspor Mərkəzi olaraq, biz bu tarixi faciənin unudulmaması, soyqırımı həqiqətlərinin beynəlxalq səviyyədə tanınması və gələcək nəsillərə çatdırılması istiqamətində fəaliyyətimizi davam etdiririk. Bu məqsədlə, hər il müxtəlif tədbirlər həyata keçirir, beynəlxalq təşkilatlar və xarici ölkələrdəki diaspor nümayəndələrimiz vasitəsilə Azərbaycan xalqına qarşı törədilmiş bu cinayəti dünya ictimaiyyətinə çatdırmağa çalışırıq.

Quba Soyqırımı Memorial Kompleksinə ediləcək ziyarət çərçivəsində BDM üzvləri və gənclər qurbanların xatirəsinə ehtiram göstərəcək, faciənin şahidi olan memorial abidə önündə anım tədbiri keçirəcək və soyqırımı faktlarını bir daha dünya ictimaiyyətinin diqqətinə çatdıracaqdır.

Biz inanırıq ki, tarixi həqiqətlərin unudulmaması və gələcək nəsillərə ötürülməsi xalqımızın mənəvi borcudur. Beynəlxalq Diaspor Mərkəzi olaraq, 31 Mart Soyqırımı Günü ilə bağlı fəaliyyətlərimizi genişləndirərək, Azərbaycanın haqq səsini bütün dünyaya çatdırmağa davam edəcəyik.

Tehsil-press.az