NDU və AMEA arasında Əməkdaşlıq Memorandumu imzalanıb

İyunun 14-də Naxçıvan Dövlət Universiteti və Azərbaycan Milli Elmlər Akademiyası arasında universitetin Elmi Kitabxanasında görüş olub.

Görüşdə NDU-nun rektoru Elbrus İsayev, AMEA-nın prezidenti, akademik İsa Həbibbəyli, AMEA Naxçıvan Bölməsinin sədri, akademik İsmayıl Hacıyev, AMEA Mərkəzi Elmi Kitabxanasının direktoru Hüseyn Hüseynov, AMEA-nın Xarici Əlaqələr və Beynəlxalq Təşkilatlarla İş Şöbəsinin müdiri Esmira Əlirzayeva, eləcə də universitetin rəhbər və akademik heyəti iştirak ediblər.

Tədbir çərçivəsində AMEA və NDU arasında elmi əməkdaşlıq haqqında Anlaşma Memorandumu imzalanıb. Memoranduma əsasən birgə tədqiqat layihələrinin icrası, elmi kadrların hazırlanması və qarşılıqlı mübadiləsi, elmi konfransların, simpoziumların və seminarların təşkili nəzərdə tutulur. Eyni zamanda kitabxana işi üzrə təcrübə mübadiləsi və kadr hazırlığına dəstək, elmi məlumatların, nəşrlərin və əsərlərin mübadiləsi, NDU-nun professor-müəllim heyəti və tələbələri üçün AMEA-nın Mərkəzi Elmi Kitabxanasının Elektron resurslarından ödənişsiz istifadənin təmin edilməsi hər iki qurumun kitabxanaları arasında əməkdaşlığın genişləndirilməsi istiqaməti sırasında planlaşdırılır.

NDU-nun rektoru Elbrus İsayev ortaq fəaliyyəti əhəmiyyətli və uğurlu əməkdaşlıq olaraq qiymətləndirib, AMEA-nın 80 illik yubileyi münasibəti ilə akademik İsa Həbibbəylini və heyətini təbrik edib, fəaliyyətində uğurlar arzulayıb. İkitərəfli əlaqələrin təhsil mühitinin inkişafına yönəldiyini, elmi əlaqələrin genişlənməsinə hədəfləndiyini bildirib. Rektor NDU ilə Bakı Dövlət Universiteti, Azərbaycan Dövlət Mədəniyyət və İncəsənət Universiteti, Azərbaycan Dillər Universiteti və digər ali məktəblərlə kitab mübadiləsinin aparıldığını xatırladıb, kitabxanaların elmi mübadilə platforması kimi məsuliyyətli roluna diqqət çəkib.

AMEA-nın prezidenti, akademik İsa Həbibbəyli görüşdən məmnunluğunu ifadə edib, əməkdaşlıqların elmin inkişafına dəyərli töhfə verəcəyini bildirib. Akademik Azərbaycan Respublikası Prezidentinin 18 mart 2025-ci il tarixli “Azərbaycan Milli Elmlər Akademiyasının 80 illiyinin qeyd edilməsi haqqında” Sərəncamını diqqətə çatdıraraq bu sənədin elmə, Akademiyaya və alimlərə verilən yüksək dəyərin bariz nümunəsi olduğunu vurğulayıb. O, yubiley tədbirinin ilk dəfə məhz doğma Naxçıvanda keçirilməsinin xüsusi əhəmiyyət daşıdığını bildirib. Akademik İsa Həbibbəyli, eyni zamanda, Naxçıvan Dövlət Universitetinin son illərdə qazandığı uğurları, elmi nailiyyətləri və beynəlxalq əməkdaşlıq əlaqələrini yüksək qiymətləndirib.

AMEA Naxçıvan Bölməsinin sədri, akademik İsmayıl Hacıyev Naxçıvan Dövlət Universitetinin ölkənin ən qabaqcıl ali təhsil müəssisələri sırasında xüsusi yeri olduğunu söyləyib. Qeyd edib ki, əməkdaşlıq hər iki tərəfin mövcud imkanları çərçivəsində qarşılıqlı faydalı olmaq və ikitərəfli əməkdaşlığın genişləndirilməsi istiqamətində səylərini birləşdirmək istəklərinə əsaslanır.

AMEA Mərkəzi Elmi Kitabxanasının direktoru Hüseyn Hüseynov, NDU-nun Elmi Kitabxanasının direktoru Xumar Məmmədova çıxış edərək birgə əməkdaşlığın daha uğurlu və səmərəli göstəricilərin əldə olunmasına vəsilə olacağını ifadə ediblər.

Daha sonra akademik İsa Həbibbəyli rektor Elbrus İsayevə və direktor Xumar Məmmədovaya AMEA Mərkəzi Elmi Kitabxanasının üzvlük vəsiqələrini təqdim edib.

Sonda birgə əməkdaşlıq münasibəti ilə görüşdən xatirə olaraq qarşılıqlı hədiyyələr təqdim edilib və foto çəkdirilib.