Dövlət Gömrük Komitəsinin sədri Səfər Mehdiyev bayram günlərində gömrük-sərhəd keçid məntəqələrində yarana biləcək sıxlıqlarla bağlı vətəndaşlara çağırış edib.
DGK sədri jurnalistlərə açıqlamasında deyib ki, istər yaz periodunda, istərsə də indi Dövlət Gömrük Komitəsi və Dövlət Sərhəd Xidmətinin əməkdaşları gücləndirilmiş iş rejimində fəaliyyət göstərir: "Çalışırıq ki, bütün texniki imkanlarımızdan istifadə edərək, sıxlığı aradan qaldıraq. Bu cür sıxlıqlar dünyanın hər yerində mövcuddur. Sərnişin axının çox olmasının müəyyən pik saatıarı var. O cümlədən nəqliyyat vasitələrinin idxal-ixrac əməliyyatları zamanı da müəyyən pik saatlar mövcuddur.
O demək deyil ki, hər hansı gömrük keçid məntəqəsində sıxlıq varsa, bu daimidir. Bir neçə saat ərzində baş verən sıxlığı aradan qaldırmaq üçün hər iki qurum gücləndirilmiş iş rejimində fəaliyyət göstərir. Xüsusilə cənub regionunda yaşayan vətəndaşlarımıza tövsiyəmiz var. Onlar səhər 9-10 radələrində gömrükdən keçməyə çalışır. Amma günorta saatlarında vətəndaşlar sərhəd-keçid məntəqələrində keçə biləcəyi halda, hər kəs səhər saatlarında getməyə çalışır. Vətəndaşlardan xahişimiz odur ki, saat məsələsini nəzərə alsınlar".
S.Mehdiyev həmçinin vurğulayıb ki, "elektron növbə" sistemi "Yaşıl dəhliz" sisteminin tətbiqindən sonra qüvvəyə minəcək: "Bunun üçün informasiya texniki vasitələrinin alınması, proqram təminatının qurulması, həm daxili imkanlarımız, proqramistlər tərəfindən, dünyaca məşhur olan şirkətlər tərəfindən həyata keçirilməsi ilə bağlı ilkin layihələndirmə işləri aparılır. Yəqin ki, 2019-cu ilin ortalarına doğru bu layihəni də həyata keçirəcəyik".

Tehsil-press.az