Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunda Bahar bayramının başa çatması ilə əlaqədar Çin fənərləri bayramı qeyd olunub.
Tədbirdə Konfutsi İnstitutunun direktoru Rafiq Abbasov Çində koronavirus epidemiyasının Bahar bayramı ilə üst-üstə düşməsindən təəssüfləndiyini deyib, məzmununa görə rəngarəng və ənənəvi Çin bayramlarının qədim tarixə malik olduğunu və nadir Çin mədəni irsinin tərkib hissəsi olduğunu qeyd edib. O xatırladıb ki, Azərbaycan Respublikasının Prezidenti İlham Əliyev Çin Xalq Respublikasının Sədri Si Cinpinə ünvanlandığı məktubda epidemiyanın və insan tələfatının yayılmasının qarşısının alınması istiqamətində Çin hökumətinin atdığı addımları yüksək qiymətləndirdiyini və bu müvəqqəti çətin günlərdə Azərbaycan xalqının dost Çin xalqı ilə həmrəy olduğunu və ona hər cür kömək göstərməyə hazır olduğunu vurğulayıb.
Konfutsi İnstitutunun əməkdaşları qonaqlara Çin fənərlər bayramının ənənələri - yanqenin rəqsi, alovlu əjdaha şəklində fənərlərlə rəqs, şirlərin rəqsi haqqında danışıblar. Sonra bayramın əsas mərasimi - ənənəvi Çin fənərlərinin yandırılması və fənərlərə təhkim edilmiş əyləncəli tapmacaların açılması olub.
Sonda ADU-nun çinşünas tələbələri Çin xalqı ilə həmrəyliyini ifadə edən “Uxan biz səninləyik!” adlı videoçarxın çəkilişində iştirak ediblər.

Tehsil-press.az