Rusiya Niderland səfirliyinin iki əməkdaşını ölkədən çıxarır. Bu barədə Rusiya diplomatik xidmətinin rəsmi saytı məlumat yayıb.
Bundan əvvəl Niderlandın Rusiyadakı müvəqqəti işlər vəkili Yoost Reyntyesin Rusiya Xarici İşlər Nazirliyinə çağrıldığı və Niderlandda iki rus diplomatının əsassız olaraq “persona non grata” elan edilməsi ilə əlaqədar etiraz bildirildiyi ortaya məlum olub.
“Bu dostyana olmayan və təxribat xarakterli addım, habelə hökumətyönümlü medianın köməyi ilə Haaqa tərəfindən təşkil edilən yeni anti-Rusiya isteriyası dövrü, Niderland hökumət dairələrində sağlam düşüncənin olmamasını, Rusiya-Niderland münasibətləri çərçivəsində real problemlərin başa düşülməməsi və bu münasibətlərin təməllərinin qəsdən pozulmasına meyllərin olduğunu göstərdi”,- deyə açıqlamada qeyd olunub.
Moskvanın qarşılıqlı əlaqə prinsipinə əsaslanaraq, Niderland səfirliyinin iki əməkdaşını ölkədən çıxarmaq qərarına gəldiyi ifadə edilib. Onlar 14 gün ərzində Rusiyanı tərk etməli olacaqlar.
Xatırladaq ki, dekabr ayının əvvəlində Hollandiya hakimiyyəti Rusiya Federasiyasından olan iki diplomatı casusluqda ittiham etmiş və onları “persona non qrata” elan etmişdi. Rusların diplomatik statusu kamuflyaj kimi isifadə etdiyi, əslində isə həmin şəxslərin Rusiyanın Xarici Kəşfiyyat Xidmətinin zabitləri olduğu bildirilib.
Rusiya səfirliyi isə Niderlandın diplomatların qanunsuz hərəkətlərinə dair heç bir sübut təqdim etmədiyini açıqlayıb.

Tehsil-press.az