Bakı Dövlət Universitetinin (BDU) Kitabxanaçılıq-informasiya fakültəsində Tələbə Elmi Cəmiyyətinin təşkilatçılığı ilə Əməkdar elm xadimi, professor Abuzər Xələfovun 90 illik yubileyinə həsr olunmuş elmi seminar keçirilib.
Professor və müəllimlərin, gənc tədqiqatçıların, tələbələrin iştirakı ilə keçirilən seminarın moderatoru elmi işlər üzrə dekan müavini Zahidə Rzayeva ölkəmizdə ali təhsilli kitabxanaçı-biblioqraf kadrların hazırlanmasında professor Abuzər Xələfovun mühüm xidmətləri olduğunu deyib. O qeyd edib ki, professor Abuzər Xələfovun 90 illik yubileyi münasibətilə bu günlərdə BDU-da respublika elmi konfransı keçirilib, konfransın plenar və bölmə iclaslarında ümumilikdə 40-dan çox məruzə dinlənilib.
Zahidə Rzayeva Tələbə Elmi Cəmiyyətinin elmi seminarının professor Abuzər Xələfovun 90 illik yubileyinə həsr edilməsini gənc tədqiqatçıların alimin irsinə yüksək ehtiramı kimi dəyərləndirib.
Elmi seminarda Kitabxana resursları və informasiya axtarış sistemləri kafedrasının doktorantı Aygün İsgəndərova “Modern kitabxana işçisinin peşəkarlığına verilən tələblər”, Kitabxanaşünaslıq kafedrasının magistrantı Sona Əlizadə “Məktəb kitabxanaları çağdaş dövrdə”, Kitabşünaslıq ixtisası üzrə tələbə Ayan Mirzəyeva “Çağdaş uşaq ədəbiyyatında Qarabağ mövzusu” adlı məruzələrlə çıxış ediblər.
Kafedra müdirləri Elçin Əhmədov, Nadir İsmayılov, Knyaz Aslan, Sevda Xələfova, dosent Rasim Süleymanov çıxış edərək professor Abuzər Xələfovun elmi irsinin öyrənilməsinin vacibliyini vurğulayıblar.

Tehsil-press.az