Azərbaycanda ilk dəfə olaraq dövlət dəstəyi ilə müasir aqrar sığorta mexanizminin tətbiqini həyata keçirən Aqrar Sığorta Fondu və ölkənin müasir və aparıcı universitetlərindən olan ADA Universiteti arasında əməkdaşlıq və tərəfdaşlıq barədə memorandum imzalanıb.
ADA Universiteti Fondunun (Azərbaycan) prezidenti Natiq Hacıyev və Aqrar Sığorta Fondunun İdarə Heyətinin sədri Fuad Sadıqov tərəfindən imzalanan memorandum universitetlə fond arasında müxtəlif sahələrdə əməkdaşlığı nəzərdə tutur.
Memorandum çərçivəsində universitetin müəllim və tələbələri son illər ölkə iqtisadiyyatının ən sürətli inkişaf edən sahələrindən olan kənd təsərrüfatı və aqrar sığorta sahələrində həyata keçirilən işlərlə bağlı ətraflı məlumat alacaq, faydalı təcrübə proqramlarına qatılacaqlar.
Sənədə əsasən, universitetin tələbələrinin bilik və bacarıqlarının davamlı inkişafının təmin edilməsi ilə bağlı layihələrin birgə icrası, o cümlədən menecment, sığorta işi və aqrar sığorta sahəsində birgə tədbirlərin təşkil edilməsi planlaşdırılır.
ADA Universitetinin müvafiq ixtisaslarda təhsil alan tələbələrinin Aqrar Sığorta Fondunda istehsalat təcrübəsi keçməsi, yay təcrübə proqramlarının keçirilməsi və sertifikatın verilməsi, eləcə də təhsil müəssisəsini bitirmiş məzunların və xüsusi istedadlı tələbələrin aqrar sığorta sistemində (Aqrar Sığorta Fondu və sistemin üzvü olan şirkətlərdə) işlə təmin edilməsi də memorandumun əhatə etdiyi mövzular sırasındadır.
Aqrar Sığorta Fondu ilə ADA Universiteti arasında başlanacaq əməkdaşlığın mühüm istiqamətlərindən biri də tələbələri fondun fəaliyyəti və buradakı mövcud vakansiyalar haqda məlumatlandırmaq məqsədilə universitetdə “Karyera günləri”nin keçirilməsi, eləcə də universitetin ixtisasartırma proqramları tərəfindən fondun əməkdaşları üçün ixtisasartırma kurslarının təşkil edilməsidir.
Xatırladaq ki, Azərbaycanda aqrar sığorta sistemi - fermer və iş adamlarına dəstək, onların risklərdən qorunması, aqrar sahənin təhlükəsiz biznes sektoruna çevrilməsi və bu sahəyə investisiyaların cəlb edilməsi məqsədilə 2020-ci ildən fəaliyyətə başlayıb.
Hazırda aqrar sığorta mexanizmi vasitəsilə 41 bitki və əkin sahəsini, kənd təsərrüfatı heyvanlarını və akvakultura məhsullarını (balıqçılıq təsərrüfatlarını) sığortalamaq mümkündür.

Tehsil-press.az