Bakı Dövlət Universiteti (BDU) və Mədəniyyət Nazirliyinin birgə təşkilatçılığı ilə “Mədəni gənclik” layihəsi davam edir.
Layihə çərçivəsində BDU tələbələrindən ibarət 300 nəfərlik qrup seçilib. Həmin tələbələr iki ay ərzində həftədə iki dəfə olmaqla nazirliyin xətti ilə keçirilən bir tamaşa və bir konsert proqramına bilet əldə ediblər. Biletlərin ödənişi BDU-nun Tələbə Həmkarlar İttifaqı Komitəsi tərəfindən həyata keçirilib.
Tələbələrə tamaşa və konsertlər haqqında təqdimat edilib, yaradıcı heyət barədə məlumat verilib. “Mədəni gənclik” layihəsinin məqsədi tələbələrin dünyagörüşünü daha da zənginləşdirmək, teatr və konsertlərə marağını artırmaqdır.
İndiyədək tələbələr layihə çərçivəsində quruluşçu rejissor Aleksandr Şarovskinin “Müsyö Jordan” (M.F.Axundzadə), quruluşçu rejissor Azər Paşa Nemətovun “Ölülər” (C. Məmmədquluzadə), quruluşçu rejissor Samir Qulamovun “Paris Notr-Dama ithaf” (V.Hüqo) tamaşalarına baxıb və Bakı Kamera Orkestrinin konsertində olublar.

Tehsil-press.az