Devid Bouinin ölümündən səkkiz il keçsə də, britaniyalı ifaçının çoxsaylı hitləri bu gün də səslənməkdə davam edir. Musiqiçi və müğənni 2016-cı il yanvarın 10-u 69 yaşında dünyadan köçüb. Eyni zamanda, Devid Boui Londondakı Kamden Musiqi Şöhrəti Xiyabanında ulduz alıb, 2025-ci ildə isə Britaniya paytaxtında artistə həsr olunan art-mərkəz yaradılacaq.
Paris də, öz növbəsində, rok-əfsanəyə lazımi qiymət verib.
“Artist ilə çoxdankı əlaqələrlə fəxr edərək, Paris şəhəri onun ölümündən 8 il sonra paytaxtın 13-cü dairəsində Devid Boui küçəsini açmaqla bu irsi davam etdirir”, - deyə şəhər administrasiyasının bəyanatında bildirilir.
Küçə rayonun irimiqyaslı yenidən planlaşdırılmasından sonra yaradılıb, təxminən “Jardin des Plantes” botanika bağı ilə Milli Kitabxana arasından keçir.
Bu təşəbbüs 2020-ci ildə Parisin 13-cü dairəsinin sabiq meri Jerom Kumeyə məxsusdur. Merin fikrincə, bütün karyerası boyunca Bouinin həm qastrolları, həm də “Miraval” studiyasında səsyazmaları ilə yanaşı, Fransa və onun paytaxtı ilə sıx əlaqəsi olub.
1965-ci ildə məhz Parisdə 18 yaşlı Boui ilk dəfə Böyük Britaniya hüdudlarından kənarda çıxış edib. Həmin il o, özünün “The Lower Third” qrupu ilə o dövrdə “rokun məbədi” hesab olunan “Golf-Drouot” meydanında konsert verib.

Tehsil-press.az