Vyanada bu görüşün baş tutması üçün Bakının mövqeyi nəzərə alınmalı idi.

Dağlıq Qarabağda hökm sürən separatik rejimin nümayəndələri Vyanada keçirilən görüşdə Azərbaycan tərəfinin etirazına görə iştirak etməyiblər. Tehsil-pressşn "Novosti Armenii" saytına istinadən verdiyi məlumata görə, bu haqda jurnalistlərə Ermənistanın hakim "Respublika" partiyasının deputatı Artak Davtyan deyib.
Deputat qeyd edib ki, Ermənistan tərəfi Qarabağın da danışıqlarda iştirak etməsini istəyir. Amma İlham Əliyevin irəli sürdüyü şərtlərə görə, separatçıların nümayəndəsi danışıqlarda iştirak etməyib.
Davtyanın sözlərinə görə, Vyanada bu görüşün baş tutması üçün Bakının mövqeyi nəzərə alınmalı idi. "Əgər Bakının mövqeyi nəzərə alınmasıydı, bu görüş baş tutmaya bilərdi və biz bu haqda əvvəlcədən məlumatlandırılmışdıq".


Artak Davtyan - Ermənistanlı deputat
Prezidentlər arasında görüş mayın 16-da baş tutub. Görüş ATƏT-in Minsk qrupunun həmsədrlərinin təşəbbüsü ilə baş tutub. Serj Sarkisyan və İlham Əliyevin görüşündə ABŞ dövlət katibi Con Kerri, Rusiya və Fransa xarici işlər nazirləri Sergey Lavrov və Jan-Mark Eyro iştirak edib. Görüş iki saatdan artıq davam edib.
Gələn ay isə Qarabağın yekun həlli üçün danışıqlara başlanacaq.
Toplantının sonunda ATƏT-in Minsk qrupu bəyanatla çıxış edib. Sənəddə deyilir ki, prezidentlər atəşkəsə və münaqişənin sülh yolu ilə nizamlanmasına sadiq olduqlarını təsdiqləyiblər. Tərəflər təmas xəttində gərginliyi azaltmaq üçün qısa müddət ərzində ATƏT-in araşdırıcı mexanizmləri üzərində işi başa çatdırmaq barədə, ATƏT-in fəaliyyətdə olan sədrinin şəxsi nümayəndəsinin mövcud rəhbərliyinin səlahiyyətlərini genişləndirməsi barədə razılığa gəliblər.
Tərəflər həmçinin Beynəlxalq Qırmızı Xaç Komitəsinin vasitəçiliyi ilə itkin düşmüş şəxslər barəsində məlumatların mübadiləsini davam etdirmək barədə razılığa gəliblər.
Azərbaycan Respublikasının prezidenti İlham Əliyev və Ermənistan Respublikası rəhbəri Serj Sarkisyan münaqişənin hərtərəfli nizamlanmasına dair dialoqun bərpası üçün danışıqların növbəti raundu barədə razılığa gəliblər. İyun ayında Azərbaycan və Ermənistan prezidentləri növbəti danışıqların yerini və vaxtını təyin edəcəklər.

Tehsil-press.az