“Təl-Əviv daha dörd ölkə ilə münasibətlərin normallaşdırılmasına dair saziş imzalamağı planlaşdırır”.
Bu barədə İsrail Baş naziri Binyamin Netanyahu yerli “Ynet” telekanalına müsahibəsində bildirib.
Netanyahu xatırladıb ki, hazırda İsrail hökuməti Birləşmiş Ərəb Əmirlikləri (BƏƏ) və Bəhreyn də daxil olmaqla dörd ölkə ilə münasibətləri normallaşdırıb.
“Mən dörd sülh sazişi imzalamışam, daha dördünü imzalamağa hazırlaşıram. Onlardan birini bir gün əvvəl müzakirə etdim. Regionun liderlərindən biri ilə 45 dəqiqəlik telefon danışığım oldu”, - hökumət başçısı bəyan edib.
Netanyahu telefonla söhbət etdiyi liderin və sülh sazişi imzalamağı planlaşdırdığı dörd ölkənin adını açıqlamayıb.
Bu məqamda qeyd edək ki, ABŞ-ın keçmiş Prezidenti Donald Trampın kürəkəni Cared Kuşner martın 15-də “The Wall Street Journal” jurnalındakı məqaləsində Səudiyyə Ərəbistanı, Qətər, Oman və Mavritaniyanın İsraillə sülhə yaxın olduğunu qeyd edib.
Xatırladaq ki, İsrail 2020-ci il sentyabrın 15-də Ağ Evdə keçirilən mərasimdə Birləşmiş Ərəb Əmirlikləri və Bəhreynlə münasibətlərin normallaşdırılmasına dair sazişlər imzalayıb.
Rəsmi Xartum ötən il oktyabrın 23-də Sudanın “terrorizmi dəstəkləyən ölkələr” siyahısından çıxarılmasına cavab olaraq, İsraillə münasibətlərin normallaşdırılması haqqında qərar qəbul edib.
Mərakeş-İsrail münasibətlərinin normallaşdırılması haqqında saziş dekabrın 10-da imzalanıb.

Tehsil-press.az