AMEA-nın akademik Z.M.Bünyadov adına Şərqşünaslıq İnstitutunun əməkdaşlarının Zəfər Gününə həsr etdikləri məqalələr İraqın “Sadaka” (Dostluq) qəzetində dərc olunub.
Qəzetin Zəfər Gününə həsr edilmiş xüsusi nömrəsində AMEA-nın vitse-prezidenti vəzifəsini icra edən Şərqşünaslıq İnstitutunun baş direktoru akademik Gövhər Baxşəliyevanın “Zəfər Günü - ədalətin bərpa edildiyi gün”, institutun icraçı direktoru dosent Ruhəngiz Cümşüdlünün “Qələbə günü - şanlı və əzəmətli tariximiz”, Ərəb filologiyası şöbəsinin müdiri dosent Xumar Ələkbərovanın “Prezident İlham Əliyevin rəhbərliyi altında Azərbaycanda uzun illər qələbə üçün mənəvi səfərbərlik işləri görülmüşdür”, Din və ictimai fikir şöbəsinin müdiri, institutun Gənc Alimlər və Mütəxəssislər Şurasının sədri fəlsəfə üzrə fəlsəfə doktoru Elnur Mustafayevin “Böyük Zəfər bayramı - Azərbaycan xalqının fəxr və qürur mənbəyi” adlı məqalələri dərc edilib.
Məqalələrdə Ermənistanın Azərbaycana qarşı işğalçılıq və etnik təmizləmə siyasətindən, bir sıra dövlətlərin, beynəlxalq təşkilatların bu məsələyə münasibətdə ikili standartlarından söz açılıb. Qeyd edilib ki, öz havadarlarının maşasına çevrilmiş Ermənistan 2020-ci il iyulun 12-də Azərbaycanın dövlət sərhədini Tovuz istiqamətində pozaraq hücum edib. Dördgünlük döyüşdə geri oturdulan düşmən bundan dərs almayaraq sentyabrın 27-də bütün cəbhə boyu geniş təxribata keçib. Bu təxribata cavab olaraq Azərbaycan Ordusu əks-hücum əməliyyatına başlayıb. Sentyabrın 27-dən başlanan Vətən müharibəsi Müzəffər Ali Baş Komandan İlham Əliyevin qətiyyəti və ordumuzun qəhrəmanlığı sayəsində Qələbə ilə başa çatıb. Noyabrın 8-də Qarabağın tacı Şuşa işğaldan azad edilib və üçrəngli bayrağımız şəhərin mərkəzinə sancılıb.
Şərqşünas alimlər 8 Noyabr – Zəfər Gününün milli qürurumuzun, yenilməzliyimizin nümayiş etdirildiyi gün olduğunu, ümumxalq birliyinin təzahürü olduğunu vurğulayıblar.

Tehsil-press.az