Naxçıvan Dövlət Universitetinin Beynəlxalq əlaqələr üzrə prorektoru Aidə Cəlilzadə təlimin açılışını edərək Türkiyə Respublikasından dəvət olunmuş müəllimləri tələbələrlə tanış edib. O, proqramın məqsədinin Azərbaycan universitetlərində stomatologiya sahəsinin inkişafına, tələbə və elmi kadrların yetişdirilməsinə dəstək vermək olduğunu vurğulayıb və proqramın gələcək hədəfləri barədə məlumat verib.

İki gün davam edəcək olan təlimin ilk günündə Türkiyə Respublikasının İstanbul şəhərində şəxsi klinikada fəaliyyət göstərən ortodont İlkin Məmmədov, restorativ diş müalicəsi həkimi İlkin Babakişiyev, İstanbul Aydın Universitetinin “Ağız, diş və çənə cərrahiyyəsi” kafedrasının müəllimi Elçin Bədəlov və “Ağız, diş və çənə radiologiyası” kafedrasının müəllimi Nuran Bayramov çıxış ediblər. Onlar tələbələrə “Ortodontiya: nədir və qısa tarixi,” “Kompozitlər və polimerizasiya,” “Radiasiya fizikasının və biologiyasının əsasları, radiasiyadan qorunma,” “Diş çəkimi texnikaları” və “Dental implantologiyada anatomiya” kimi mövzularda ətraflı məlumat veriblər.

Tehsil-press.az