“Çox qəribədir ki, bir şair haqqında danışanda “keçmiş səhiyyə naziri”, “çinovnik”, “həbsxanada yatan”, “birinci arvadından ayrılıb, ikinci arvadı ilə də dolanmır” kimi etiketlər işlədirik. Axı bunların poeziyaya, yaradıcılığa nə dəxli var? Əli İnsanov adlı bir müəllifin şeirlər kitabı çıxıb. Söhbət bundan getməlidir. Sosial şəbəkələrdə deyirlər ki, Əli İnsanov niyə şeir yazmalıdır? Belə suallar məni heç vaxt maraqlandırmır. Min il əvvəl Nizami Gəncəvi necə adam olub? Arvadı ilə dolanıb? Bunlar bizi maraqlandırmamalıdır. Poeziyanın yaşı olmur, buna görə Əli İnsanovun yaşı da məni maraqlandırmır. Mənim üçün yeni imzadır. Yaxşı kitabdırsa, oxuyacağam. Bundan sonra oxucu kimi rəyimi bildirəcəyəm”.Bu sözləri açıqlamasında Əməkdar incəsənət xadimi, şair Baba Vəziroğlu deyib.
“Həbsxanada, yəqin ki, insan öz-özü ilə tək qalır. Mən şeirlərimin çoxunu əsgərlikdə yazmışam. Bir növ yaxın çevrədən təcrid olunursan, özünlə tək qalırsan. Poeziya özünlə söhbətin məhsuludur. Əli İnsanovun şeirlərini harada yazdığı mənim üçün maraqlı deyil. Yəqin, həbsxanada özü ilə dialoq imkanı daha çox olub. İlk sevgisini xatırlayıb, ona vəfasız çıxanları, özünün kiməsə vəfasızlıq etməsini xatırlayıb, dərin düşüncələrə qərq olub. Hislərini poetik misralara çevirmək istəyib. Bilmirəm, çevirə bilib, ya yox. Vaqif Səmədoğlu deyirdi ki, dünyada təzə mövzu yoxdur. Hamı bir neçə mövzunu öz bildiyi, düşündüyü kimi, romantikasının işığında ifadə edir. Əli müəllim də belə düşünüb, normal bir şeydir. Gənc müəllifə uğurlar arzulayıram, qələmi iti olsun, yazıb-yaratsın. Bu adam pis işlə məşğul deyil ki. Oğurluq, kiməsə xəyanət etməyib. Şeir yazıb də. Şeir yazmaq dünyada ən gözəl peşədir. Deməli, insandır, insanları daha çox insan olmağa çağırır. Kaş gəclərimiz də yaxşı işlə məşğul olsunlar. Zəif yazsınlar, amma şeir yazsınlar. Qoy zəif çəksinlər, amma rəsm çəksinlər. Çexov deyib ki, dünyada ən əlçaq şey bekar olmaqdır. Bekar olanda insan sosial şəbəkələrdə ağzına gələni yazır, qonşusuna paxıllıq edir. Şeir yazan hər kəsə, o cümlədən Əli müəllimə uğurlar arzu edirəm”, - o bildirib.
Tehsil-press.az
