Bu gün Azərbaycan Mətbuat Şurasının təşəbbüsü ilə «Media və radikal cərəyanlara qarşı mübarizə yolları» mövzusunda konfrans keçirilib.

Şuradan Tehsil-press.az-a verilən məlumata görə, tədbiri giriş sözü ilə açan MŞ sədri, Milli Məclisin deputatı Əflatun Amaşov bildirib ki, Azərbaycan mediasının dini məsələlərə yanaşma tərzi mənəvi əhəmiyyət daşıyıb. Bu zaman hər hansı təfriqəçilik meyli nəzərə çarpmayıb. Başlıca olaraq dinin dövlətdən ayrı olması prinsipi rəhbər tutulub, dövlətçilik maraqlarına sadiqlik nümayiş ön planda olub.
Azərbaycanın dövlətçilik maraqlarında Türkiyə ilə strateji müttəfiqliyin mühüm həlqəni təşkil etdiyini vurğulayan Ə.Amaşov onu da bildirib ki, qardaş ölkədə iyulun 15-də həyata keçirilmiş dövlət çevrilişi cəhdi Azərbaycan cəmiyyəti, o cümlədən mediası tərəfindən şiddətlə qınanılıb. Bu baxımdan çevriliş cəhdini edən nurçuların ölkəmizdə də dayaqlarının mövcudluğu istiqamətində diskussiyalar açılıb. Ə.Amaşov medianın bu sayaq məsələlərə münasibətdə həssas davranmasının zəruriliyini əsaslandırıb. Hansısa şəxsin və şəxslərin bu xüsusda damğalanmasının düzgün yanaşma olmadığını vurğulayıb. Cəmiyyətdə bölücülüyün yaranmaması üçün medianın hadisə və proseslərə obyektiv yanaşmasının, faktlara söykənməsinin vacibliyini bildirib.
Prezident Administrasiyasının ictimai-siyasi məsələlər şöbəsinin əməkdaşı Bəhruz Həsənov Azərbaycan dövlətinin mediaya hər zaman diqqət və qayğı ilə yanaşdığını vurğulayıb. Buna qarşılıq kütləvi informasiya vasitələrinin də jurnalistikanın təməl prinisiplərinə, Həsən bəy Zərdabi ənənələrinə sadiqliyinin zəruriliyini əsaslandırıb.
Medianın cəmiyyətdə bölücülük yaratmağa xidmət edən cərəyanların ifşasında mühüm missiya daşıdığını önə çəkən PA rəsmisi bunun dövlətçilik maraqlarının müdafiəsi prinsipindən irəli gəldiyini deyib. O, həmçinin Azərbaycan dövlətinin müəyyən siyasi məqsədlər gerçəkləşdirməyə çalışan dini sekta və cərəyanlara qarşı mövqeyinin hər zaman barışmaz xarakter daşıdığını diqqətə çatdırıb.
Dini Qurumlarla İş üzrə Dövlət Komitəsinin şöbə müdiri Nahid Məmmədov çıxışında bildirib ki, Azərbaycan dövlətinin həyata keçirdiyi siyasətdə qardaş Türkiyə ilə müttəfiqliyə sadiqlik əsas xətt olub. Bunun nəticəsi idi ki, vaxtilə nurçu dini təriqətinə məxsus ədəbiyyatların ölkəyə gətirilməsinə izacə verilmişdi. Bununla belə Azərbaycan dövləti bu istiqamətdə yarana biləcək təhlükələri nəzərə alıb və müvafiq tədbirlər həyata keçirib.
İslam dinindən sonra yaranmış islamçı cərəyanların siyasi məqsədlərə hesablanmış mövqe seçdiklərini xatırladan «Yeni Azərbaycan» qəzetinin baş redaktoru, Milli Məclisin deputatı Hikmət Babaoğlu bu prosesin milli dövlətlərin sıradan çıxarılması məqsədi daşıdığını vurğulayıb. O, Azərbaycan cəmiyyətinin belə mənfi təmayüllərə qarşı hər zaman səfərbər olmasının vacibliyini bildirərək medianı mövcud istiqamətdəki fəaliyyətdə başlıca ictimai institut kimi dəyərləndirib.
MŞ İdarə Heyətinin üzvü, Milli Məclisin deputatı Musa Qasımlı bildirib ki, dini təhlükəsizlik hər bir ölkənin milli təhlükəsizliyi müstəvisində dəyərləndirilən məsələdir. Bu məsələdə geniş toplumla yaxınlıq baxımından məscidlər nə qədər mühüm rol oynayırlarsa, KİV-lər də eyni mövqedədirlər.
MŞ İdarə Heyətinin üzvü, «İki sahil» qəzetinin baş redaktoru Vüqar Rəhimzadə çıxışında Azərbaycanın dünyəvi təməllər üzərində qurulmuş müstəqil respublika olduğunu bildirib. Bu təmələ qarşı hər hansı kənar qüvvələrin qarşısının qətiyyətlə alınmasının vacibliyindən söz açıb. Baş redaktor belə məsələlərə münasibətdə KİV-lərin göstərdiyi həssaslığın ümumvətəndaş və ümumdövlət maraqlarına söykəndiyini bildirib.
«Səs» qəzetinin baş redaktoru Bəhruz Quliyev nurçu təriqətinin Azərbaycana 1990-cı ilin əvvəllərində ayaq açdığını xatırladıb. O bildirib ki, bu təriqətin daşıdığı siyasi məqsədlərin Azərbaycanın dövlət maraqları ilə ziddiyyət təşkil etməsi aktuallığını saxlayan məsələlərdəndir.
MŞ İdarə Heyətinin üzvü, «Yeni Müsavat» qəzetinin baş redaktoru Rauf Arifoğlu müzakirə olunan mövzunun əhəmiyyətini əsaslandırarkən vurğulayıb ki, burada söhbət təkcə Türkiyəni və Azərbaycanı deyil, bütövlükdə türkdilli ölkələri cənginə almış təhlükədən gedir. Baş redaktor onu da bildirib ki, nurçuların, fətullahçıların Azərbaycanda özlərinə dayaq tapmalarının əsasında Türkiyə dövləti ilə həmrəylik nümayişi durub. Lakin 15 iyulda Türkiyədə baş vermiş dövlət çevrilişinə cəhddən sonra məsələ fərqli müstəvidə dəyərləndirilməlidir. Çünki çevriliş cəhdi əslində Türkiyə dövlətçiliyinin çökdürülməsi cəhdi idi ki, bu da yolverilməzdir. Eyni zamanda nurçularla əlaqəsinin olduğu bildirilən şəxslərə qarşı 1937-ci il repressiyalarını xatırladan tərzdə davranılması da məqbul deyil.
«Xalq cəbhəsi» qəzetinin baş redaktoru Elçin Mirzəbəyli nurçuluğa qarşı mübarizənin peşəkar qurulmasının vacibliyini əsaslandırıb. O bildirib ki, mövcud istiqamətdə tutarlı araşdırmalar aparılmalıdır. İttihamçılıq dəst-xətti mahiyyətcə gülənçiliyin xeyrinədir.
MŞ İdarə Heyətinin üzvü, Orta Asiya və Güney Qafqaz Söz Azadlığı Şəbəkəsinin sədri Azər Həsrət bildirib ki, Türkiyədəki dövlət çevrilişinə cəhd ilə nurçuların terrorçu mahiyyəti üzə çıxdı. Bu isə Azərbaycanda onlarla əlaqəsinin olduğu bilinən şəxslərin mühüm dövlət qurumlarından, o cümlədən ölkə parlamentindən sıxışdırılmasını zəruriləşdirir.
MŞ sədrinin müavini, Jurnalistlərin Həmkarlar İttifaqının sədri Müşfiq Ələsgərli çıxışında dini maarifləndirmə və müxtəlif dini cərəyanların doğurduğu təhlükəyə dair dövlət qurumları ilə birgə tədbirlərin davamlı şəkildə təşkil olunmasını təklif edib.
MŞ İdarə Heyətinin üzvü, «Şərq» qəzetinin baş redaktoru Akif Aşırlı Azərbaycan mətbuatının müzakirə olunan məsələyə daim yer verdiyini vurğulayıb və əlavə edib ki, ümumən baxış elmi-konseptual mahiyyət daşımalıdır. Baş redaktor onu da bildirib ki, hazırda siyasi partiyaların sosial bazası yoxdur, ancaq dini təriqətlər öz ətraflarında müəyyən kütləni toplayırlar. Vəziyyətin nə üçün bu cür şəkil almasına da diqqət yetirilməlidir.
MŞ İdarə Heyətinin üzvü, «APA Holdinq»in rəhbəri Vüsalə Mahirqızı deyib ki, müxtəlif dini cərəyanların daşıdıqları siyasi mahiyyətlə bağlı cəmiyyətdə mütəmadi şəkildə təbliğat işləri aparılmalıdır. Ancaq bu təbliğat heç bir halda hüquqi dövlətin norma və prinsipləri çərçivəsindən kənarda olmamalıdır.
Milli Məclisin deputatı Elman Nəsirov bildirib ki, nurçular Türkiyə kimi güclü dövlətin əsaslarını zəiflətmək üçün ciddi cəhd etdilər. Kim təminat verə bilər ki, onların tərəfdarları eyni hərəkətlərini Azərbaycanda reallaşdırmaq istəməyəcəklər? Buna görə də cəmiyyətin, o cümlədən medianın təhlükəyə qarşı hər zaman səfərbər olması şərtdir.

Tehsil-press.az