Azərbaycan Dillər Universitetində (ADU) IV İslam Həmrəyliyi Oyunlarında könüllü iştirak edəcək tələbələrlə görüş keçirilib. Görüşdə universitetin Tərbiyə işləri üzrə prorektoru, professor Ələddin Əliyev, IV İslam Həmrəyliyi Oyunları Əməliyyat Komitəsinin korporativ direktoru, eləcə də “Bakı-2017” könüllülərinin səfiri Elçin Səfərov və tələbələr iştirak ediblər.
Tədbiri giriş sözü ilə açan professor Ə.Əliyev tələbələri beynəlxalq səviyyəli idman yarışında könüllü qismində fəal iştirak etməyə səsləyib və onlara fəaliyyətlərində uğurlar arzulayıb.
Daha sonra E.Səfərov IV İslam Həmrəyliyi Oyunları nəzdindəki “Könüllülər Proqramı”na müraciət etmiş namizədlərə könüllülük prinsipi, o cümlədən öz iradəsi və sərbəst seçimi əsasında bu oyunlarda iştirak etməyin önəmli cəhətlərindən danışıb. O, könüllülərin fəaliyyət müddəti ərzində intizamlılıq, xoşrəftarlılıq, operativlik, kollektivdə işləmək bacarığı, təşkilatçılıq, təşəbbüskarlıq kimi keyfiyyətlərə yiyələnə biləcəklərini vurğulayıb.
Tədbir tələbələri maraqlandıran sualların cavablandırılması ilə sona yetib.

ADU-nun Mətbuat Xidməti