Hanoy şəhərində Azərbaycanın 28 May - Respublika Gününün 99-cu, həmçinin Azərbaycanla Vyetnam Sosialist Respublikası arasında diplomatik münasibətlərinin qurulmasının 25-ci ildönümünə həsr olunmuş rəsmi qəbul keçirilib.
Azərbaycanın Vyetnamdakı səfirliyindən Təhsil-press.az-a verilən məlumata görə, tədbirdə Vyetnam Prezidenti Administrasiyasının, Nazirlər Kabinetinin, Milli Assambleyanın, Kommunist Partiyasının, Xarici İşlər Nazirliyinin, digər dövlət və hökumət qurumlarının rəsmiləri, Hanoy şəhərində akkreditə olunmuş diplomatik korpusun nümayəndələri, Azərbaycanın təhsil ocaqlarının vyetnamlı məzunları, kütləvi informasiya vasitələrinin nümayəndələri iştirak edib. Vyetnam tərəfindən tədbirə fəxri qonaq qismində xarici işlər nazirinin müavini Vu Honq Nam qoşulub.
Tədbir Azərbaycan və Vyetnamın dövlət himnlərinin səsləndirilməsi ilə başlamışdır.
Daha sonra çıxış edən səfir Anar İmanov 1918-ci ildə yaradılmış və şərqdə ilk parlament respublikası olan Azərbaycan Xalq Cümhuriyyətinin (AXC) dövlətçilik ənənələrindən söhbət açmış, AXC-nin mövcud olduğu 23 ay ərzində daxili və xarici siyasətdə qazandığı böyük uğurlardan danışmışdır. Səfir 1991-ci il oktyabrın 18-də Azərbaycanın dövlət müstəqilliyinin bərpa edildiyini qeyd etmiş və suveren Azərbaycan Respublikasının AXC-nin hüquqi varisi olduğunu vurğulamışdır.
A. İmanov Azərbaycanın dövlət müstəqilliyin qorunması, sürətli iqtisadi inkişafı, beynəlxalq aləmdə mövqelərinin möhkəmlənməsi naminə müasir Azərbaycanın memarı, Azərbaycan xalqının ümummilli lideri Heydər Əliyevin və onun layiqli davamçısı Prezident İlham Əliyevin fəaliyyətindən bəhs etmiş, dövlətimizin müxtəlif sahələrdə qazandığı çoxsaylı nailiyyətlər barəsində tədbir iştirakçılarına məlumat vermişdir. Səfir, həmçinin çıxışı zamanı Ermənistanın Azərbaycana qarşı yürütdüyü işğalçılıq siyasəti barədə ətraflı məlumat vermiş, Ermənistan-Azərbaycan Dağlıq Qarabağ münaqişəsinin Azərbaycanın ərazi bütövlüyü və beynəlxalq səviyyədə tanınmış sərhədlərinin toxunulmazlığı prinsipləri əsasında öz ədalətli həllini tapacağına əminliyini ifadə etmişdir.
A.İmanov Azərbaycan ilə Vyetnam arasındakı diplomatik münasibətlərini 1992-ci ildə qurulmasına baxmayaraq, xalqlarımız arasında dostluq əlaqələrinin təməlinin hələ Sovet İttifaqı dövründə qoyulduğunu bildirmişdir. Məhz ulu öndər Heydər Əliyevin Azərbaycana rəhbərlik etdiyi və Sovet İttifaqının Nazirlər Şurası sədrinin birinci müavini vəzifəsində çalışdığı dövrdə çoxlu sayda vyetnamlı gəncin Azərbaycanın ali təhsil ocaqlarında oxuduğunu, həmçinin azərbaycanlı mütəxəssislərin müharibədən sonra Vyetnamın inkişafında müstəsna rol oynadıqları diqqətə çatdırmışdır. Müasir dövrdə də əlaqələrin yüksələn xətlə inkişaf etdiyini bildirən səfir 2014-cü ildə Azərbaycan Respublikası Prezidenti cənab İlham Əliyevin Vyetnama dövlət səfərinin, 2015-ci ildə Vyetnam Sosialist Respublikasının Prezidenti Truonq Tan Sanqın Azərbaycana rəsmi səfərinin ölkələrimiz arasında əməkdaşlığın sürətlə inkişafının bariz təzahürü olduğunu vurğulamışdır. Səfir son illər ölkələrimiz arasında iqtisadi-ticari, humanitar sahələrdə əlaqələrin inkişafı barədə tədbir iştirakçılarına məlumat vermişdir.
Tədbirdə Vyetnam dövlətini təmsil edən xarici işlər nazirinin müavini V.H.Nam çıxışında Vyetnam hökuməti və xalqı adından Azərbaycanın ölkə rəhbərliyini və xalqımızı bu əlamətdar gün münasibəti ilə təbrik edərək, son illər ərzində müxtəlif sahələrdə Azərbaycanın əldə etdiyi çoxsaylı mühüm nailiyyətləri yüksək qiymətləndirdiyini, həmçinin Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən modernizasiya və inkişaf üzrə strateji siyasətin yeni uğur qazanacağına inandıqlarını bildirmişdir.
Nazir müavni Vyetnam xalqının birlik və müstəqillik uğrunda mübarizəsinə, həmçinin milli quruculuq və inkişafına Azərbaycan xalqının verdiyi dəstəyi hər zaman dərin təşəkkür hissi ilə xatırladığını və bu köməkliyə görə minnətdar olduğunu bildirmişdir.
2017-ci ildə iki ölkə arasında diplomatik münasibətlərin qurulmasının qeyd edildiyini bildirən V.H.Nam son illər ərzində ölkələrimiz arasında ənənəvi dostluq əlaqələrinin hərtərəfli və sürətlə inkişaf etdiyini qeyd edib, Vyetnam və Azrbaycanın çiyin-çiyinə öz dövlətlərini müdafiə etdiklərini söyləmişdir. O, hər iki ölkə rəhbərliyinin möhkəm iradəsi və qətiyyəti ilə Vyetnam ilə Azərbaycan arasındakı çoxşaxəli əməkdaşlığın gücləndirilib inkişaf etdiriləcəyinə əminliyini ifadə etmişdir.
Çıxışlardan sonra tədbir iştirakçılarına Azərbaycanın müstəqilliyin bərpasından sonrakı dövrdə əldə etdiyi uğurları, habelə hərtərəfli inkişafını əks etdirən sənədli film nümayiş etdirilmişdir. Tədbir zamanı milli mətbəx nümunələrindən ibarət ziyafət verilmişdir.

Təhsil-press.az