Akademik borcu qaldığına, bərpa olunduğuna və ya köçürülmə yolu ilə universitetə gəldiyinə görə fənn fərqi yaranan və buna görə də alt qruplarda oturan tələbələr üçün 2018/2019-cu tədris ilinin yaz semestri imtahanlarında biliyin qiymətləndirilməsində tətbiq edilməsi mümkün olan əsaslı güzəştlər tətbiq ediləcək.
Bu barədə Gəncə Dövlət Universitetinin rektoru, professor Yusif Yusibov mayın 14-də ali təhsil müəssisəsinin müvafiq ixtisaslarında təhsil alan tələbələri ilə görüşdə məlumat verib.
Bildirilib ki, əvvəllər alt qruplar üçün imtahanlar mərkəzləşdirilmiş qaydada, kompüterdə test üsulu ilə keçirilib. 2018/2019-cu tədris ilinin yaz semestri imtahanlarında isə biliyin qiymətləndirilməsi müvafiq fakültələrdə yazılı formada təşkil olunacaqdır. Həmçinin 2018/2019-cu tədris ilinin yaz semestrində universitetə köçürülən 112 nəfər tələbəyə və akademik borcu yaranmış 400 nəfərdən artıq tələbəyə əsaslı güzəştlər tətbiq ediləcəkdir.

GDU-nun Mətbuat Xidməti