Azərbaycan Dövlət Neft və Sənaye Universitetinin (ADNSU) nəzdində fəaliyyət göstərən Azərbaycan-Fransız Universitetində (UFAZ) bu ali məktəbə keçirilmiş qəbul imtahanlarında uğur qazanan abituriyentlərdən 160-ı seçilib.
Bu barədə Tehsil-press.az-a UFAZ-ın icraçı direktoru Vazeh Əsgərov məlumat verib. İcraçı direktor deyib ki, Dövlət İmtahan Mərkəzinin (DİM) mərkəzləşdirilmiş qəbul imtahanında I qrup üzrə 500 və daha çox bal toplayan 497 abituriyent UFAZ-a qəbul imtahanında iştirak etmək üçün qeydiyyatdan keçib, onlardan 448-i imtahanlarda iştirak edib.
UFAZ-ın tələbəsi adını qazanmış gənclərin ümumi təsdiqlənmiş siyahısı Təhsil Nazirliyinə və DİM-ə təqdim ediləcək və siyahıda olan abituriyentlər digər ali məktəblərə qəbul müsabiqəsində iştirak etməyəcəklər.
UFAZ-da dörd ixtisas - geofizika mühəndisliyi, kimya mühəndisliyi, neft-qaz mühəndisliyi və kompüter elmləri ixtisasları üzrə tədris həyata keçirilir. Hər ixtisas üzrə 40 nəfərin qəbul olunması nəzərdə tutulur.
UFAZ məzunları iki diplom (Strasburq Universiteti və ya Ren 1 və ADNSU) alacaqlar.

Tehsil-press.az