Suriyada İŞİD terror qruplaşmasının lideri Əbu Bəkr əl-Bağdadinin böyük bacısı Rəsmiyə Avad saxlanılıb.
Bu barədə “Associated Press” agentliyi anonim türkiyəli məmura istinadən məlumat yayıb.
Mənbənin sözlərinə görə, 65 yaşlı Avad ekstremist qruplaşma ilə əlaqədə şübhəli bilinir. O, 4 noyabrda Suriyanın Hələb əyalətindəki Azaz şəhəri yaxınlığında ailəsi ilə birlikdə yaşadığı yük konteynerinə basqın zamanı tutulub. Bu rayon Türkiyənin nəzarətində olan ərazinin bir hissəsidir.
Mənbə bildirib ki, Avadla birlikdə onun həyat yoldaşı, gəlini və 5 nəvəsi saxlanılıb. Yetkin ailə üzvlərinin hamısı dindirilib.
Mənbənin sözlərinə görə, Bağdadinin bacısının tutulması kəşfiyyata fayda gətirəcək: “Belə şeylər kəşfiyyat üçün qızıl mədənidir. Onun İŞİD haqqında bildiyi hər hansı bir məlumat qrup haqqında anlayışımızı əhəmiyyətli dərəcədə genişləndirə bilər və daha çox pis adamları tutmağımıza kömək edə bilər”.
Qeyd edək ki, ABŞ Prezidenti Donald Tramp 27 oktyabrda Əbu Bəkr əl-Bağdadinin Suriyada keçirilmiş əməliyyat zamanı öldürüldüyünü bəyan edib.

Tehsil-press.az