Azərbaycan Dillər Universitetində (ADU) 2019/2020-ci tədris ilinin yaz semestrinin imtahan sessiyası onlayn qaydada başlayıb. İmtahanlar iyunun 8-dən etibarən 5 həftə ərzində təşkil olunacaq. Bununla bağlı universitetin rektoru, akademik Kamal Abdulla müvafiq əmr imzalayıb. Əmrə əsasən müəyyən səbəbdən onlayn dərslərdə iştirak etməyən və digər platformalarla əlaqə saxlayan tələbələr də 50 bala qədər müəllim tərəfindən qiymətləndiriləcək, davamedici fənlər üzrə əvvəlki semestrdə tələbənin imtahandan topladığı bal bu semestrdə keçərli hesab olunacaq.
Bildirilib ki, tələbə iyunda təşkil olunan imtahandan imtina edib avqust-sentyabr ayında təşkil olunacaq icmal dərslərdə iştirak edərək sentyabrda imtahan verə bilər.
Əvvəlki semestrlərdə iki fənn üzrə (hər fəndən bir dəfə olmaqla) buraxılış kurslarında oxuyan tələbələr də daxil olmaqla və cari semestrdə hər hansı bir fənn üzrə akademik borcu yaranmış tələbənin imtahanlarının ödənişsiz əsaslarla təşkil olunması təmin ediləcək.
Yaz semestrinin nəticələrinə görə təqaüd almaq hüququ olan tələbələrin siyahısı 2020-2021-ci tədris ilində növbəti semestr başlayanadək müəyyən edilir. Akademik borcunu 2020-2021-ci tədris ili başlayanadək ləğv etmiş tələbə də növbəti semestrdə təqaüd almaq hüququ olan tələbələrin siyahısına daxil edilir.
Rektorun əmrinə əsasən mövcud pandemik şəraitdə onlayn imtahanların keçirilməsi zamanı tələbənin fikrini tam aydın və ətraflı izah edə bilməsi üçün lazımi şərait yaradılacaq.
İmtahan sessiyası zamanı sədri universitetin rektoru olmaqla apellyasiya komissiyası fəaliyyət göstərir. Müraciətlərə operativ şəkildə reaksiya veriləcək.
İmtahanlar universitetin hər 3 korpusunda üç növbədə səhər saat 10:00-dan 18:00-a qədər əvvəlcədən hazırlanmış, internetlə təchiz olunmuş otaqlarda sosial məsafəni qorumaq şərti ilə keçirilir.
366 qrup üzrə 872 fəndən imtahan davamedici fənlərlə bağlı verilmiş qərara əsasən 529 fənn olmaqla 40 faiz azalıb. Gün ərzində hər 3 tədris binasında təxminən 1500-ə yaxın tələbə onlayn imtahan verir.
İyunun 8-nə olan statistik nəticələrə görə I növbə təşkil olunan imtahanlarda 635 tələbə onlayn imtahan verib, kəsilən tələbə olmayıb. Ən yüksək bal toplayan tələbənin imtahan nəticəsi 100 bal, ən aşağı bal toplayan tələbənin imtahan nəticəsi isə 62 bal olaraq qeyd olunub.
İmtahanlar zamanı tələbələr yüksək bilik nümayiş etdirirlər.
Qeyd edək ki, ADU-nun rektoru, akademik Kamal Abdulla iyunun 4-də universitetin tələbələrinə və magistrantlara müraciət edib. Müraciətdə bildirilib ki, ali təhsil ocağı öz səlahiyyətləri çərçivəsində mövcud vəziyyəti nəzərə alaraq tələbələr üçün böyük güzəştlər edib.
İmtahan sessiyası iyulun 5-dək davam edəcək.

Tehsil-press.az